سهام البارودي – كود//

قطاع الصحة غادي و كايخلع عباد الله ! هاد السيمانة دوزت نهار فموريزگو فكازا ! نهار ماتبغيهش لعدوك، الزحام و الغوات و المضاربات بين الفراملية و ناس الادارة و المواطنين ! ظروف بعيدة كل البعد على مستشفى عمومي كايقصدوه الناس المرضى باش يتشافاو بل بالعكس تقدر تدخل ليه صحيح فصيح و تخرج منو مريض ! مريض بالفقصة و الغمة و الحگرة لي كاتشوفها فعينين المرضى و عائلاتهم !

انعدام الامكانيات اللوجيستيكية ! ماكاينش العدد الكافي من الكفاءات الادارية و الطبية ! ماكاينش النظام لا من طرف المواطنين لا من طرف الموظفين لي فيهم لي طالعة ليهم خدمتهم فراسهم و كايشوفو فيك بالتخنزيرة ! الانتظار لي كايطول لساعات و شي مرات لاسابيع و لشهور …. فحالا كلشي متافق باش يگوليك ” لاكنتي مزلوط فالمغرب و ماعندكش باش تمشي للكلينيك غا بلا ماتمرض ”

اما داكشي ديال المعطيات الشخصية و السوكري ميديكال ماكاينش ! السميات كايتشايرو ! البيبان ديال المكاتب مفتوحين ! الضواسا مشتتين !الوراق و التحاليل و السكانيرات محطوطين !  غا حل عينيك و غاتقرا سميت جارك و باش مريض و لاش جاي !

هزيتي قلوعك و مشيتي لشي كلينيك ! كاتلقا قدامك خدمات “متوسطة” و لكن حيت نتا موالف بالسبيطار كاتبان ليك ديك الخدمات فيها شوية د الضو ! بعدا فالكلينيك غاتلقا معامن تهضر ! بعدا فالكلينيك غادي تلقا شوية د النقا ! بعدا الموظفات غايتعاملو معاك كبنادم ! ايه غايضربوك تاتنقز فالاثمنة و غاتلقا راسك واخا عندك تغطية صحية مامغطي من والو ! عريان زبط كيما ولداتك مك قدام الاثمنة الباهضة لي كايطلبو المصحات الخاصة فحالا هادوك الناس فاش كانو خدامين كايديرو الاسقف ديال التغطية الصحية ماكانش فراسهم بلي الاثمنة ديال الخدمات فالمصحات الخاصة راه مدوبلة و متريبلية على داكشي لي محددين هوما ! و حبس حبس حبس ! كيفاش ؟ قاليك خاصك تعطي النوار ؟! كيفاش هاد النوار ! آ سيدي النوار ولا كايتطلب فاغلب المصحات الخاصة و كايفرضو عليك تحط شيك و لا تخلص مبلغ مالي خارج الفاتورة ! علاش هادشي ؟! باش ديك الكلينيك ماتخلصش الضريبة لي مفروضة عليها و بعض الدكاترة ديالنا و مالين المصحات الخاصة يديرو لاباس و يزيدو يبنيو فالفيلات و يشريو فالطوموبيلات و العقارات …..حيت كيما كاين Médecins sans frontières فالعالم كاين عندنا حنا بعض les médecins sans scrupules!

هادشي كايخليك تسول راسك واش انا فمصحة و لا سيرك عمار ؟!

ها هوا المواطن اليوم قبل بالامر الواقع و بسياسة شري تنضغ كري تبات ! و لكن شكون غايحميه من الجشع ديال بعض المصحات الخاصة لي كاتشوفيهم فحال شي بگرة خاصهم يحلبوها تاتسيل بالدم ! دابا هانتوما كاتشجعو الخوصصة ياك آ سيدي و لكن هادشي راه ماولاش خوصصة هادشي ولا سميتو الرأسمالية البشعة لي كاتخلي عباد الله تطحن فبعضياتها ! المدارس الخاصة كاتطحن المواطن ! المصحات الخاصة كاتطحن المواطن ! الضرائب كاتطحن المواطن ! و كيفاش بغيتو هاد الطبقة المتوسطة دير لاباس و تعيش بيخير و تزيد القدام و نتوما كاطحنو فيها من الللور و القدام ؟!