كود سبور//

كشف الطالياني كارلو أنشيلوتي مدرب ريال مدريد الإسباني، أن هاديك الأرقام المالية الخيالية، اللي كيروج أن الاتحاد الدولي لكرة القدم خصصها للأندية المشاركة فكأس العالم للأندية 2025، غير إشاعات وما عندها حتى أساس من الواقع، وأكد أن ريال مدريد ما غايشاركوش فالبطولة حيث الجائزة المالية المخصصة للبطل ضعيفة بزاف بالمقارنة مع الفلوس اللي كيدخلها ريال مدريد فالماتشات العادية ديالو.

وخلال حوار نشراتو  جريدة “إل جورنالي” الطاليانية اليوم الاثنين، قال كارلو أنشيلوتي على كأس العالم للأندية 2025 فالمريكان، اللي غاتكون بنسخة جديدة فيها 32 فريق: “خاص ينساو أن ريال مدريد غايشارك فيها، اللاعبون والأندية ما غايشاركوش فهاد البطولة، راه ماتش واحد لريال مدريد كيدخل ما يساوي 20 مليون أورو، والفيفا باغيين يعطيونا هذا المبلغ فالبطولة كاملة.. ما يمكنش”.

وباغيين ينظمو الاتحاد الدولي لكرة القدم نسخة جديدة من كأس العالم للأندية، فيها 32 فريق، وكيمثل الوداد الرياضي الكرة المغربية فهاد النسخة بعدما ربح دوري أبطال إفريقيا 2022، ولكن غياب ريال مدريد وأندية بهاد القيمة العالمية، يقدر ينسف البطولة وهاد المشروع ديال الفيفا.