كود كازا//

فكل عام كاين ناس كيديرو البوز في العالم الافتراضي، وكيشدو الطوندونس المغربي. كاين منهم لي عندو النفس طويل، وكيبقى جاري العشرة، وكاين لي كيموت ليه الحوت ديك الساعة، كيتشهر شوية وكيرجع من بعد للحياة العادية ديالو.

اليوم گود جمعات 5 ديال سميات لي ماركاو سنة 2018، والسؤال هو واش غادي يبقاو العام جاي؟ الجواب عندكم.

ساري كول.. مولات “هااااا هوا”

سارة لي معروفة بساري كول، بنت تطوان عايشة في اسبانيا، وتشهرات بتخسار الهضرة والحماقات ديالها قبال الكاميرا فالايفات اللي كادير.

سارة كدير فيديوهات كيوصلو لمليون مشاهدة فسيمانة، وكتهدر فكولشي! التعليم والطب والجنس والدعارة، واي موضوع… ماكين غير شرح ملح.

وملي تشهرات شوية دارت أغنية  “ها هوااا”، وكاملة فيها “نتا نتا القواد لي سمحتي فيا. نتا نتا القواد غادي تندم عليا”، وهي بقات هاد الأغنية فالطوندوس ديال المغرب لأسابيع طويلة.

سينا.. مخلوقة من الفضاء

المراكشية غبرات شي عامين، ورجعات بقوة في 2018، ماكينش شي موضوع يكون منوضها في المغرب ومتدويش عليه. من الطبخ حتال السياسة ونت غادي.

سينا لي كانت دخلات لمهرجان مراكش ديال سينما بموطور طالقاها مزيان، واخترت تبقا تهدر على الكائنات الفضائية باعتبارها هي وحدة منهم.

أكثر فيديو دار بوم في الانترنت هاد العام هو اللي بغات دير فيه تأمين على ترمتها وطالبات بتدخل العثماني شخصيا، حيت ترمتها حسن من ديال جنيفر لوبيز وكيم كاردشيان.

ندى حاسي.. كيم كاردشيان الخميسات

على ذكر سينا وترمتها حسن من ديال كيم كاردشيان، مايمكنش مندويوش على ندى حاسي، كيم كاردشيان الخميسات.

هاد العام تعرفنا عليها بصفتها مغنية، وخرجات في حوارات صحافية لكن عوراتها ملي قالت أنه ميشرفهاش يشبهوها بكيم حيت هي مسلمة، هادشي جر عليها موجة ديال سخرية.

غير هو هاد الشهر وقبل ما تخرج 2018 ضاربات مع باسو ووصفاتو بكلمات عنصرية، الشي لي خلاها تحيد انستگرام لي كان فيه مليون متابع ودير واحد جديد “محترم” على حساب تفسيرها لهاد الكلمة طبعا، ودارت الحجاب.

يونس بولماني.. “حتى لقيت لي تبغيني”

بنادم نعس واحد الليلة وفاق لقى كلشي كيغني “حتى لقيت لي تبغيني عاد جاية تسولي فيا”، المغرب طلع كلو حنين ومحن من جهة الحب، وناض كولشي كيقلب على المغني لي صدق هو يونس البولماني.

ولد زاكورة كان معرس مع ولاد دوارهم، ناض شي واحد خرج الفيديو وهو ينتشر بحال العافية. ولكن دار البوز شوية وهو يغبر… استهلكوه بزاف.

ياسر.. فرتوتة يا حوتة

آخر ما غنات أم كلثوم هو “زوين زوين والله للا بوكوص، أفرتوتة يا حوتة”، دري مالقا ميدار شد تلفون طلا كريم لوجهو وبدا كيغني مع التلفون.

واحد من صحاب الكازاوي لي كيقرا المسرح سرب الفيديو، وولا هو حديث مواقع التواصل الاجتماعي، دار ضجة حتى هو شي 15 ليوم.