كود ـ بني ملال//
صباح الخميس 16 يونيو، خرج من بوجدور، 47 حراݣ، فيهم 11 شاب من مدينة أبي الجعد، وفيهم متزوجين لي خلاو عيالاتهم وولاد صغار، بالإضافة لمجموعة من القاصرين وامراة بين المجموعة.
حسب معطيات توصلات بها أسر المفقودين، الاتصال تقطع معاهم ساعات قليلة من بعد ما خرجو، وهادشي خلا فرضية الغرق أو تكون زهقات بهم الفلوكة وسط البحر تكون قوية.
هاد المأساة رجعات ذكرياتنا لمآسي سابقة، بحال لي وقع سابقا فرحلة من الداخلة صدقات غادية للراس الأخضر، اللي كانو فيها ضحايا بزاف من جهة بني ملال، وخلات أثر كبير على المنطقة وعلى أمهات المختفين.
من بعد هاد الاختفاء الأخير، خرجو شباب المدينة بحملة إلكترونية على مواقع التواصل الاجتماعي تحت هاشتاج #انقذوا أبناء أبي_الجعد باش يعبروا على قلقهم وخوفهم على لي ضاعو فالبحر.
العائلات ناشدو السلطات المغربية والإسبانية باش يكثفو جهودهم فعمليات البحث والإنقاذ، سواء بالبحر ولا بالجو، كما ناشدو المنظمات الإنسانية الدولية بحال الهلال الأحمر والصليب الأحمر باش يشاركو فهاد العمليات.
