الرئيسية > آراء > ايوا الله ينعل لي مايحشم : نفس الشعب لي كايتشكى من الغش و الفساد فالدولة و المسؤولين هوا براسو لي كايبارطاجي السكرينات ديال الباك و الجهوي فالفايسبوك و كايطلب عباد الله ” عافاكم عاونوني ! بغيت الأجوبة” !
08/06/2019 18:00 آراء

ايوا الله ينعل لي مايحشم : نفس الشعب لي كايتشكى من الغش و الفساد فالدولة و المسؤولين هوا براسو لي كايبارطاجي السكرينات ديال الباك و الجهوي فالفايسبوك و كايطلب عباد الله ” عافاكم عاونوني ! بغيت الأجوبة” !

ايوا الله ينعل لي مايحشم : نفس الشعب لي كايتشكى من الغش و الفساد فالدولة و المسؤولين هوا براسو لي كايبارطاجي السكرينات ديال الباك و الجهوي فالفايسبوك و كايطلب عباد الله ” عافاكم عاونوني ! بغيت الأجوبة” !

سهام البارودي – كود//

لابقيتي تابع المغاربة راه يسطيوك ! شعب المتناقضات بامتياز ! كلشي كايتشكى من الغش و الفساد فالدولة ! و نهار كاتبان شي فيديو ديال شي واحد لقا  شي ارض مغشوشة و لا شي حليب خاسر و لا شي ياغورت كايتباع فايت الصلاحية ، كايخرجو عباد الله من الغيران كايتشكاو و يغوتو و يبارطاجيو ” اللهم ان هذا لمنكر” ” لك الله يا وطني ” ” تصبحون على وطن ” كاتشوف هادشي كاتقول مع راسك تبارك الله شحال واعيين هاد الناس و شحال بعقلهم و شحال كايبانو مسؤولين ، و غير كايوصل وقت الامتحانات كاتلقى هاداك النيت لي كان كايتشكى من الغش و الفساد هوا براسو مكونيكطي مع ولد ختو لي كايدوز الباك و كايقلب ليه على الأجوبة ديال الباك فالفايسبوك هادشي لاماكانش هوا براسو كايوجد ” النقلة” باش يدوز الامتحان! نفس الانسان لي كايتشكى من فساد الدولة و غش المسؤولين ! كايمارس الفساد و الغش فحياتو و بلا حشمة بلا حيا و بالنسبة ليه راه عادي ! اليوم الصباح شفت بزاف ديال السكرينات ديال الامتحانات كايدورو فالفايسبوك ” عافاكم عطيوني الأجوبة نعاون ولد خالي ” ” عافاكم “عاونوني” ! كايتخباو ورا كلمة ” عاون ” ” تعاون” باش زعما يخبيو الغش و الفساد لي كايمارسو و هادشي كايثبت المقولة الشهيرة ديال موحماد مول الحانوت ” المغاربة ماكايتشكاوش من الفساد ! كايتشكاو لامالقاو كي يديرو يستافدو منو”.

بنادم باغي يعيش فدولة الحقوق و المساواة و العدل و كايظل يهضر على اوروبا و حقوق اوروبا و نظام اوروبا و مساواة اوروبا و كيفاش الاوروبيين زوينين و نقيين و منظمين و معقولين و هوا بكرو ماقادش يطبق هادشي فحياتو الخاصة ! ماقادش يبدا من راسو و يكون مربي ! و يكون حقاني ! و يكون نقي و يكون منظم و يكون معقول ! باغي يعيش عيشة اوروبا بلا مايبدل تا مجهود ! باغي اوروبا و باغيها تجيه باردة ! باغي التقدم التيكنولوجي و هوا كايوجد ” النقلة” ديال الفيزيك و الصيونص و الماط ! و شكون غايدير التقدم التيكنولوجي لطاسيلت مك لا نتا نقال و صاحبك نقال و صاحبتك نقالة ؟؟ شكون غايصنع ليك السمارتفون و نتا تا المتطابقات الهامة ماقاد تحفظهم ! باغي ينوض و يلقا الزناقي نقيين و مشطبين و فيهم ريحة الورد و هوا يلوح ديك الخنشة ديال الزبل عامرة بقشور السويهلة و السردين فين ماكان حيت مافيهش لي يتمشا تايلقا شي بركاصة ! باغي ماتكونش المحسوبية و الزبونية فسوق الشغل و لكن هانية لاغش هوا فالامتحان و ” تعاون” معاه المراقب و خلاه ينقل.

بنادم ماباغي يقرا ! ماباغي يخدم ! ماباغي يگاجي فالعسكر ! ماباغي يخلص ضرائب ! ماباغي يتعلم شي حرفة ! ماباغي يبدل ادنى مجهود فحياتو و باغي يعيش تاهوا مزيان ! باشمن حق ؟! هادشي كايبين  بلي المغاربة ماكايظلمهم حد ! كايظلمو راسهم براسهم ! و كايظلمو بعضياتهم ! حيت لاكان المسؤول شفار ! و الطبيب گزار و المحامي شلاهبي و الطاشرون غشاش راهم ماجاوش من كوكب زحل ! وليداتكم و خوتكم و ولاد عمكم و نتوما هادوك ! منكم و اليكم ! و باش تقتل باش تموت آ ملك الموت !

موضوعات أخرى