كود ـ سبور//

تجمعو آلاف الناس فالعاصمة المكسيكية مكسيكو، فمحاولة باش يسجلو رقم قياسي جديد فموسوعة “غينيس” كأكبر موجة بشرية فالعالم، قبل يام قليلة من كأس العالم 2026، اللي غادي تنظمو المكسيك ومريكان وكندا.

المشاركين تستفو على طول شارع “باسيو دي لا ريفورما”، واحد من أشهر الشوارع فالمدينة، لابسين تيشورتات المنتخب المكسيكي وهازين الرايات ديال بلادهم، ومن بعد دارو فدقة وحدة “الموجة المكسيكية”، اللي فيها الجمهور كينوض ويهز يديه بالتتابع باش تتشكل موجة بشرية كدوز من واحد لواحد.

هاد المبادرة جات احتفالاً بـ 40 عام على انتشار “الموجة المكسيكية” فالعالم فمونديال 1986 اللي استاضفاتو المكسيك، واللي ولات من بعد تقليد معروف فالملاعب الرياضية فالعالم.

https://x.com/i/status/2063719765827273108

وأكدو المنظمين أن الهدف ماشي غير تحطيم رقم قياسي سابق، ولكن خلق فئة جديدة فموسوعة “غينيس” كتخص أكبر موجة بشرية كدار برا الملاعب، وحسب تقارير إعلامية، شاركو 36 ألف واحد فهاد الحدث، فانتظار التأكيد الرسمي من لجنة “غينيس”.

وكتعكس هاد المبادرة الحماس الكبير اللي عايشاه المكسيك قبل ما يبدا مونديال 2026، حيث غادي تولي أول دولة فالتاريخ كتستاضف كأس العالم للرجال ثلاث مرات، من بعد 1970 و1986.