كود -كازا //

حقق المغرب رقم قياسي جديد فصادرات الكُرم فـ2025 حسب موقع إيست فروت، العام اللي فات صدّر المغرب  32 ألف و600 طن، ودخل أكثر من 14 مليون دولار ،هاد الرقم كيمثل زيادة بـ10% مقارنة مع 2024، وطلع بـ8 مرات ونص مقارنة مع 2020 ، وفهاد الخمس سنين الأخيرة، الصادرات كانت كتطلع بمعدل نمو سنوي وصل لـ54%، وهو رقم كبير بزاف.

دابا المغرب ولى من بين أكبر 3 دول مصدّرة لبراعم بروكسل فالعالم من بعد المكسيك وهولندا، التصدير كيكون طول العام، ولكن كيزيد أكثر فالربيع والخريف ،من مارس حتى يونيو، الكميات كتمشي بالأساس لأوروبا، فين المغرب ولى مورد موثوق وبديل مهم، ومن غشت حتى دجنبر، الفاياجات كتمشي كثر لأسواق غرب إفريقيا.

أوروبا حتى هي باقية سوق استراتيجية، خصوصاً هولندا اللي كتعتبر مركز لإعادة التصدير لباقي الدول الأوروبية وحتى بريطانيا ولات سوق طالعة من بعد البريكست تزادت الصادرات المغربية ليها بعشرة أضعاف، وفبعض الأشهر كتشكّل حتى نص واردات بريطانيا من هاد المنتوج، وخا هكاك  إفريقيا باقية هي الوجهة الرئيسية حيث موريتانيا والسنغال خداو أكبر حصة من الصادرات بنسبة 60.9% و23.3%. والسنغال سجلات أقوى نمو فـ2025 بزيادة 30%.

ومع البرد اللي ضرب الاتحاد الأوروبي فهاد الشتاء ولي اثر  على الإنتاج، متوقعين دور المغرب يزيد  يكبر كمزوّد موثوق فالسوق الدولية.

https://east-fruit.com/en/news/morocco-achieves-record-brussels-sprouts-exports-in-2025/