كود بني ملال//

حال وكيل الملك فالمحكمة الابتدائية ديال قصبة تادلة، اليوم الخميس مع العشية، النائب الثاني لرئيس جماعة قصبة تادلة وموظف متقاعد على الجلسة وهما معتاقلين، تتابع الأول بتهمة الرشوة والثاني بالمشاركة فيها. ودابا تحطّو فالحبس المحلي ديال بني ملال بينما يتقدمو قدّام القضاء الخميس الجاي.

القضية بدات نهار الاثنين اللي فات، منين واحد المواطن صيفط شكاية فالرقم المباشر ديال التبليغ على الفساد والرشوة، قال فيها بلي طلب منّو واحد المسؤول 300 درهم باش يخليه يستافد من طوموبيل الإسعاف ديال الجماعة.

وبتنسيق محكم بين البوليس وتحت إشراف النيابة العامة، دارو مصيدة وطيحو المشتبه فيه متلبّس كيشد الفلوس اللي تشكا بيها المواطن، ومن تما شدّوه هو وداك الموظف المتقاعد، ودّاوهم للتحقيق قبل ما يتعرضو على وكيل الملك.