كود كازا//

خصصت قناة” TF1″ تقرير على قطاع تنظيم العراسات كنوع من أنواع السياحة المروجة فالمغرب، واللي كتجذب بزاف ديال الأزواج الفرنسيين.

وأوضح التقرير أن بزاف ديال ليكوبل الفرنسيين كيختارو المغرب كوجهة يديرو فيه العراسية ديالهم لأجواؤو لإستثنائية والخدمات الفخمة مع الأثمنة المناسبة.

كما هو الحال فحالة أليكسيا وتوماس اللي تدار عليهم التقرير، كوبل فرنسيين ختارو صحراء أݣافاي، نواحي مراكش، يدوزو فيها ليلة العمر، بحيث مقابل مبلغ 40 ألف أورو، خداو عرض فيه الموسيقى، ݣناوة، راقصة شرقية، والماكلة وجوج ليلات فأوطيل خمس نجوم ليهوم ولضيافهم الخمسين.

اما بالنسبة لاصحاب الريسطوات واللي كينظمو هاد الحفلات، فإن تنظيم هاد النوع من المناسبات، وخاصة خلال موسم الذروة، كيكون فيه مدخول كبير لان فليلة وحدة يقدرو يدخلو حتى 3500 أورو، وهو ما يعادل أسبوعين من العمل، كما يوضح البعض.
الميزانية تقدر تكون غالية الا انه وبحسب، كيتلي فيلسانت،مديرة وكالة فعاليات، هاد النوع من الخدمات كطيح بالضوبل ففرنسا، وتضيف، انه فالمغرب وكالات تنظيم الفعاليات اللي كتقدم هاد النوع من الخدمات عليها الطلب بزاف.

أما بالنسبة للاحتفال الديني، فكيدوزوه فكنيسة الشهداء بمراكش بحيث يحتفل الكاهن بالاحتفال مع ميزة إضافية وهي فرقة الإنجيل. وهادي ميزة للمغرب، البلد فيه التسامح الديني والعيش المشترك مبدأ اساسي .