كود كازا ////

حسن بنعدي ومحمد الشيخ بيدالله وحكيم بنشماس 3 امناء عامين سابقين لحزب غريب تأسس فظروف غريبة اسمو الاصالة والمعاصرة٬ ناضو ضد الامين العام الحالي عبد اللطيف وهبي. هادو باش يبانو كثار زادو شي حد اسمو فاتح الذهبي وقالو باللي “أول منسق عام مكلف بالادارة والتنظيم”. لمغاربة عارفين شكون كان كينسق وشكون كان كيدير الادارة والتنظيم وقت التأسيس.

هادو 3 بغاو ناس الحزب يجريو على وهبي. باش تعرفهم حزب لا ديموقراطية لا سيدي زكري. قال ليك يا سيدي بغاو من المناضلين “يضطلعوا بواجبهم بكل حزم و صرامة لإعادة حزبهم إلى خطه القويم، الهادف بصدق و مسؤولية الى الانتصار دائما إلى ما يخدم مصلحة الوطن و مصلحة الشعب، و فاء لشعارنا لحظة التأسيس: السياسة بشكل مغاير، و المغرب غدا بكل ثقة!”. نخليكم انتوما ضحكو على هاد العبارة: السياسة بشكل مغاير. شوفو اللي دخل لهاد الحزب من نهار بان وعلاش دخل اش دار وباش خرج.

قبل ما نرجعو للهجوم على وهبي٬ كيبان ان هاد جوج من الامناء العامين السابقين لهاد الحزب ما وقعوش على هاد البيان: الياس العماري ومصطفى الباكوري. هادو بجوج كان عندهم تأثير كبير فتاريخ الحزب. باش ما وقعش إلياس هاد الشي خاوي. هو اكثر واحد كيعرف البام. كيعرف كيفاش تأسس وكيعرف قيمة كل واحد من هادو اللي دازو عليه.

بنعدي وبنشماس والشيخ كيآخدو على وهبي باللي اداؤو غريب وسلوكاتو غير مسؤولة وغير محسوبة العواقب. كما هاجمو بلا ما يسميوه شخصيا٬ مواقفو المتضاربة وتصريحاتو العشوائية ومعاركو الجانبية اللي كيتقلب غير على الاستفزاز واشعال الفتن وباللي وهبي ولى كيشكل “مصدر انزعاج للراي العام وتشويش متواصل على اداء وزراء حزبه”

واعلن هادو الثلاث “استياءهم من كل الممارسات و التصريحات و التهديدات الصادرة عن هذا “الأمين العام” و التي تعتبر استنزافا مجانيا لشعبية ومصداقية الحزب” وتبرئو “من هذه التصرفات” وعبرو عن “رفضهم القاطع لها باعتبارها تنكرا غير مقبول و انحرفا خطيرا بالنسبة للمشروع المؤسس للحزب وقيمه واخلاقياته المنتصرة للممارسات الفضلى في العمل السياسي وفي اداء المهام و المسؤوليات العمومية” وقالو باللي السكوت على هاد الشي “اخلالا بالأمانة”.

كلام كبير وصافي من هاد السياسيين اللي ما عمرنا سمعنا صوتهم تقريبا٬ باستثناء مرة مرة بنعدي٬ فقضايا كبيرة. دابا باغيين يطلعوها على صحاب الحزب “تبرؤهم” وهما اصلا ما بقاوش تقريبا فهاد الحزب.

وهبي دار اخطاء وكثيرة واكيد اقل بكثير من اخطاء هادو اللي كيعطيوه اليوم الدروس. راه بيناتنا التاريخ. وهبي يحسب ليه حاجة وحدة فتاريخ التراكتور. رجع هاد الحزب عادي. خرجو من “الوافد الجديد” و”الحزب المهيمن”. حيد عليه لعنة الولادة. نسى الناس كيفاش تأسس وشكون بصاح اسسو وعلاش اسسو واش دار باش جمع صحاب لفلوس والاعيان مع شي بقايا اليسار.

وهبي فهادي دار للحزب كثر بزاف من هادوك الثلاث. واحد فيهم دار معركة كبيرة ماشي دفاعا على فكرة او اطلاق سراح صحاب الريف او الصحافيين. اللا. دارها باش يبقى يتخلص على شي تخربيقة دايرها وكيقول عليها مركز للتفكير واخر كيقلب على شي منصب سفير فشي دولة…