كود – كازا //

أكدات محكمة الاستئناف ديال كازا اليوم الاثنين، الحكم الابتدائي لي خرج فحق المؤثرة سكينة بنجلون المعروفة بلقب “أغلى طلاق” كيف ما أكدات الحكم اللي كان خرج فحق الطليق ديالها، بعد ما رفضات المحكمة گاع الطعون لي تقدمات فالضوصي.

المحكمة الزجرية ديال عين السبع كانت حكمات ابتدائياً على سكينة بنجلون بـ3 أشهر حبس نافذاً، زيد عليها خطية تعطيها طليقها، كما صدر حكم فحق الزوج ديالها بشهر سورسي، وخطية ديا 4 المليون سنتيم لطليقتو سكينة ،وفحالة متخلصاتش غادي تكون خطية تعويضية بقيمة 10 ملايين سنتيم لفائدة الطليق.

كترجع تفاصيل هاد القضية لقرار وكيل الملك بالمحكمة الزجرية ديال عين السبع، اللي قرر متابعة المؤثرة فحالة اعتقال ،هاد المتابعة جات من بعد الشكاية اللي تقدّم بها الطليق ديالها قدام النيابة العامة، واللي كيّتهم فيها بنجلون بالتشهير من السوشلميديا.

وبهاد القرار الاستئنافي، كيتأكّد الحكم الابتدائي بجميع مقتضياتو، وكيكون الملف دخل مرحلة التنفيذ، فواحد من القضايا اللي دارت الشنعة فسوشلميديا بسباب الشهرة “الرقمية” ديالها وحضورها فالسوشيال ميديا.