وكالات//

فواقعة غريبة حرّكات الرأي العام فإيرلندا، المحكمة ديال دبلن حكمات على الشابة إيمي ماكولي (عندها 35 عام) بـ3 سنين ديال الحبس، من بعد ما تكتاشف أنها زورات الموت ديالها باش تهرب من المحاكمة ف قضايا ديال السرقة والنّصب.

وحسب جريدة “ميرور”، ماكولي كانت متهمة باستعمال وثائق مزوّرة باش تاخد كريدي من البنك بـ10 آلاف أورو، وحاولات تاخد كريدي آخر، ومن بعد نشرت إعلان وفاة كاذب باسمها فموقع RIP.ie فآخر 2022، وفيه تفاصيل ديال جنازتها المزعومة وكلمات وداع من ’’عائلتها وأصحابها‘‘.

ولكن القصة ما سالاتش هنا، حيت المتهمة زورات شخصية أختها وقدّمت أوراق مزوّرة لمجلس مقاطعة ويكسفورد، وهاد الشي خلاهم يصدروا جوج شهادات وفاة رسميين باسمها.

من بعد، البوليس اكتاشفو أنها ما ماتاش، منين شافوها فتصاور كاميرات المراقبة فعرس فشهر يونيو 2023.

وزيد عليها، ماكولي كانت قالت للي خدامة عندو أنها توفات، وحاولات تاخد تعويض ديال “الوفاة فالخدمة”، وفعلاً خذات 9 آلاف أورو من بعد ما زورات شخصية أختها مرة أخرى.

وفاش جا وقت النطق بالحكم، القاضية أورلا كرو قالت إن اللي دارتو المتهمة “خدعة محبوكة ومخطط ليها مزيان”، وأكدات أن السلوك ديالها كان “محاولة متعمدة باش تعرقل سير العدالة”.