الرئيسية > تبركيك > 3 ديال المغاربة ماتو فكسيدة خايبة فأوكرانيا
18/09/2020 22:00 تبركيك

3 ديال المغاربة ماتو فكسيدة خايبة فأوكرانيا

3 ديال المغاربة ماتو فكسيدة خايبة فأوكرانيا

عفراء علوي محمدي- كود//

ماتو 3 ديال الطلبة المغاربة فكسيدة خايبة وقعات فمدينة زاباروجيا جنوب شرق أوكرانيا، و3 خرين تجرحو.

وحسب مواقع أوكرانية، الكسيدة وقعات لبارح الخميس مع 8 دالعشية حسب التوقيت الأوكراني، بحيث دخلات طوموبيل من نوع BMW، واللي كانو فيها المغاربة الثلاثة اللي ماتو، فطوموبيل من نوع Nisan، وهذشي اللي خلا الطوموبيل اللولة تفقد السيطرة، وتدخل فبوطو دالإشهار، وتشعل فيها العافية.


ومازال السلطات الأكرانية ما قدرات تحدد سبب وفاة المغاربة الثلاث (2 دراري فعمرهم 21 عام وبنت فعمرها 17)، واش ماتو بسبب العافية اللي شعلات فالطوموبيل أو بسبب قوة الاصطدام، وسافطات الجثث المتفحمة ديال المغاربة اللي ماتو لقسم التشريح.

وطوموبيلة Nisan ماتضرراتش بزاف، وكانو فيها 3 ديال المغاربة اللي تشرحو بجروح خفيفة، وهوما اللي حكاو للبوليس آش وقع بالضبط.

موضوعات أخرى