كود – كازا ///

قال موقع “Jewish Press”، أن 3 ديال المسعفين الإسرائيليين عتقو طفل صغير عندو3 سنين فـ ريسطو بمدينة أكادير، بعد ما وحلات ليه الماكلة ورجع لونو زرڭ.

هاذ الواقعة طرات الثلاثاء الفايت. هاذ المسعفين المتطوعين فجمعية غير حكومية ف القدس كيدوزو كونجي ف أكادير ومشاو ياكلو ف هاذ الريسطو وغير سمعو الغوث ناضو يشوفو شنو واقع.

قدمو الصفة ديالهم للناس وقدرو يتدخلو ف الوقت المناسب ويديرو جهدهم حتا رد الطفل الماكلة اللي وحلات ليه ورجع اللون ديالو طبيعي وكيتنفس بشكل عادي، حسبما ذكرت الصحيفة ذاتها.

وف الأخير، شكرات أسرة الطفل الأشقاء الثلاثة اللي الأسماء ديالهم على التوالي: موشيه وناتي وإيتسيك أسولين. وقال موشيه أسولين: “كنا في المكان المناسب في الوقت المناسب وفعلنا ما كان سيفعله أي شخص لديه التدريب المناسب”.

https://www.jewishpress.com/news/middle-east/north-africa-middle-east/united-hatzalah-volunteer-emts-save-choking-infant-in-agadir-morocco-restaurant/2022/12/29/