كود ـ بني ملال//

محكمة الاستئناف فبني ملال ضربات مفتش الشرطة متّهم بقتل الممرضة الشابة فاطمة أكنوز، اللي أصلها من خنيفرة، بـ25 عام ديال الحبس نافذ.

وفاة فاطمة كانت فحادثة هزّت الرأي العام المغربي، حيث لقاوها مقتولة فظروف غامضة بعدما غبرات لمدة قصيرة، والتحقيقات بيّنت أن مفتش شرطة هو اللي متورّط فالجريمة.

القضية صدمات بزاف ديال الناس، حيت فاطمة كانت معروفة بخدمتها فالمجال الصحي وتفانيها فخدمة المرضى، وكانت كتستعد تبدا حياة جديدة بعد التخرج والعمل فمستشفى عمومي.

وخلال الجلسة الأخيرة، منين سمع المتهم الحكم عليه، قال بصوت عالي: أشهد أن لا إله إلا الله”، وسط انهيار عائلتو اللي كانو حاضرين فالقاعه وقلوبهم عامرة بالحزن.

الجريمة خلات الحزن فخنيفرة كاملة، وكانت فاطمة دفنات وسط دموع العائلة والأصدقاء والناس اللي عرفوها، واللي مازال ما تقبلو كيفاش تتحوّل قصة شابة طموحة لقصة مأساوية.