عمر المزين – كود//

أصدر الملك محمد السادس بمناسبة عيد العرش، البارح الثلاثاء، عفوا ملكيا شمل عدد من السجناء، من بينهم 23 كانو محكومين بالإعدام.

وقالت آمنة بوعياش، رئيسة المجلس الوطني لحقوق الإنسان، أن “هاد العفو إذا حسبنا منذ بداية الألفينات، غادي يخلينا نقولو أن أكثر من 240 محكوم بالإعدام استفدو من عفو ملكي.

الرقم، حسب تصريح الحقوقية بوعياش، “كيعادل تقريبا أربع مرات ونص عدد الناس اللي باقيين محكومين نهائيا بالإعدام اليوم”.

بوعياش وضّحات أنه غير في 5 سنين الأخيرة، 185 واحد استافدو من العفو من عقوبة الموت، كيفما قالت بوعياش، عقوبة، اللي من وجهة نظر حقوقية، قاسية وغير مجدية، وبالرغم من أن المغرب ما نفّذش أي حكم بالإعدام منذ 1993، المحاكم مازالت كتحكم بها، حيث القانون باقي كيتيحها.

شحال كان من واحد محكوم بالإعدام في المغرب؟ بوعياش قالت أنه كاينين 86 شخص محكومين بالإعدام، 54 عندهم حكم نهائي، و32 باقيين كيتسناو الاستئناف أو النقض. من بين هاد المجموعة، امرأة وحدة فقط.

رئيسة المجلس الوطني لحقوق الإنسان قالت بأن الفصل 20 من الدستور كيضمن الحق في الحياة، وزادت أن المجلس، مع الائتلاف المغربي لمناهضة عقوبة الإعدام، خدمو على حملات سنوية باش المغرب يصوّت لصالح توصية الأمم المتحدة لوقف تنفيذ العقوبة، وهو ما تحقق فـ دجنبر الماضي.