كود – سبتة //

تريفولا 21 حراك للمغرب من بعد ما توقفو فسبتة، مورا ما اتهمتهم السلطات الإسبانية بأنهم استهدفو دورية عسكرية وعناصر من الحرس المدني، فواقعة طرات ليلة السبت حدا شاطئ ترامبولين.

وحسب وكالة الأنباء الإسبانية «إفي»، الحراكة كانو داخلين فصداع بيناتهم، قبل ما يوصلو العسكر ويدخلو وسط المعمعة ويجي فيهم الحجر بلا ميتجرح حتى واحد

الموقوفين، اللي كاملين مغاربة، اعترفو بمشاركتهم فالحادث مقابل مايدوزوش الحبس ومن بعد تقرر إرجاعهم للمغرب.

وفنفس الأسبوع، تسجلات جوج قضايا أخرى ضد حراكة مغاربة ولي تحكمو بعامين ديال الحبس مني بغاو يدافعو على راسهم قدام الكواردية سيفيل قبل ما يتم استبدال العقوبة بمنعهم من دخول إسبانيا لمدة خمس سنين.

ومنذ بداية أزمة الهجرة فسبتة، أواخر يوليوز، تسجلات أكثر من 50 حالة اعتداء على الشرطة والحرس المدني والعسكريين، وفق معطيات نقابة Jupol، الشي لي كيبين بلي كاينة شي حاجة ماشي صحيحة فالتعامل مع الحراگة.

وبحسب نفس المعطيات، كانت محاكم سبتة توصلات حتى نهاية غشت بـ53 شكاية مرتبطة بالاعتداءات ومقاومة عناصر الأمن والقوات المسلحة.