وكالات//

علنو علماء الحفاظ على البيئة فبربادوس على واحد الاكتشاف اللي اعتبروه مذهل، مللي لقاو أصغر أفعى فالعالم، اللي سميتها “أفعى الخيط البربادوسية”، بعد ما كانت مختفية لأكثر من 20 عام.

هاد الأفعى فيها ما بين 9 حتى لـ10 سنتيمترات فالطول، ورفيعة بزاف حتى كتجي بحال خيط ديال المقرونة، وكانت مسجلة ضمن لائحة فيها 4800 نوع ديال الكائنات اللي انقرضات علمياً.

وحسب ما قالت جريدة “الغارديان”، الأفعى تْلقات فمارس الماضي، خلال واحد المسح البيئي اللي دارتو وزارة البيئة فبربادوس بتعاون مع منظمة Re:wild اللي كتخدم على حماية التنوع البيولوجي.

اللي لقاو الأفعى هما كونور بلايدز، المسؤول على المشروع فالوزارة، وجاستن سبرينغر، اللي مسؤول على برنامج الكاريبي فـRe:wild، ولقاوها تحت واحد الصخرة فوسط الجزيرة.

وفواحد الموقف مضحك، قال سبرينغر وهو كيقلب فالصخور تحت جدر شجرة: “كنشُم ريحة ديال أفعى خيطية!”، وفالحقيقة كانت فعلاً كاينة تحتها. من بعد، تأكّدات الهوية ديالها فجامعة جزر الهند الغربية، بعدما فحصوها تحت الميكروسكوب، ولاحظو عليها خطوط برتقالية باهتة، وكذا القشور المميزة اللي فوق نيفها.

أول مرة تسجلات فيها هاد الأفعى كانت فـ1889، ومن داك الوقت ما كاينينش بزاف ديال المشاهدات اللي توثقات. هاد الأفعى كتتكاثر جنسياً، وكيخرج منها غير بيضة وحدة كل مرة، وداكشي علاش النمو ديال عددها بطيء بزاف، ماشي بحال شي زواحف أخرى اللي كاتقدر تبيض حتى بلا تزاوج.