نجوى المالحي- كود//

بعد النجاح الكبير ديال الدورة الأولى، مهرجان Nostalgia Lovers غادي يرجع بقوة لمدينة الدار البيضاء، من 3 حتى لـ6 يوليوز، ففضاء Go Vélodrome، اللي كيعرف كيفاش يحتضن اللحظات الكبيرة.

فندوة صحافية، عثمان بنعبد الجليل، منظم هاد المهرجان، كشف على دورة جديدة غنية ومختلفة، فيها أكثر من 40 عرض موسيقي من نجوم عالميين من الثمانينات والتسعينات وبداية الألفينات.

من بين الأسماء اللي غادي تكون حاضرة: Thomas Anders من فرقة Modern Talking، Lou Bega، وMontell Jordan، و”بومي ام” وغيرهم من الفنانين اللي الأغاني ديالهم بقات محفورة فذاكرة جيل كامل.

المهرجان كيقترح تجربة متكاملة، ماشي غير حفلات، ولكن أنشطة تفاعلية كتدّي الجمهور فرحلة زمنية وسط ديكور كلاسيكي وموسيقى كتحيي ذكريات الماضي. كاين فضاءات ديال الألعاب القديمة، ستوديو MTV بحالو فزمان، Photobooths، مسابقات ديال اللوك، وأكلات من الزمن الجميل مقدمة عبر Food trucks.

من بين الجديد فهاد الدورة، كاين Brunch “Olé Nostalgia” نهار الأحد 6 يوليوز، اللي غادي يحوّل الفضاء لواحد الفيريا أندلسية بنكهة عائلية وموسيقى فلامنكو، مناسبة تجمع الأجيال فجو مريح ومليء بالنوستالجيا.

الهدف من المهرجان هو خلق لحظة لقاء بين الأجيال، وتكريم الموسيقى والذكريات اللي كبرنا معاها. والمنظمين كيتوقعو حضور أكثر من 25 ألف شخص، مع تنظيم مقاد من طرف Public Events، اللي عندها تجربة طويلة فالمجال الثقافي والفني.

العد التنازلي بدا، وكازا غادي تعيش أيام كلها فن، ذكريات، وموسيقى قديمة لي كترجعنا للذكريات.