كود سبور//

كشفو 2 أطباء دارو التشريح لجثة اسطورة كرة القدم الأرجنتيني دييگو ارماندو مارادونا، انه كان كتيتعذب، وان حجم القلب ديالو كان مدوبل على الحجم ديالو الطبيعي، وهذا الشي ملي قالو الشهادة ديالهم بجوج قدام المحكمة، اللي كاتحاكم الطاقم الطبي اللي كان مكلف بالعلاج ديالو، واللي متهمين بالإهمال الطبي اللي ساهم فالموت ديالو.

وهضر  ماوريسيو كاسينيلي، وهو طبيب شرعي قلب جثة نجم الأرجنتين ونابولي الإيطالي السابق فالدار ديالو نواحي بوينوس آيرس الأرجنتينية فين مات عن عمر 60 عام، وقلبها حتى فتشريح اللي تدار لها بعد ساعات قليلة، وقال انه كانت هناك “علامات عذاب” فالقلب، ووضح طبيب التشريح ان الألم غايكون بدا “قبل 12 ساعة على الأقل” من الموت ديال مارادونا، وقدّر وقت تشريح الجثة كان بين 9 الصباح و12 ديال الظهر بالتوقيت الأرجنتيني بتاريخ 25 نوفمبر 2020، وقال طبيب التشريح ايضا بلي الما كان فالريا ديال مارادونا لمدة “10 أيام على الأقل” قبل ما يموت بسبب “قصور فالقلب” و”تليّف الكبد” وهذا الشي بعد 2 سيمانا باش دار عملية جراحية، واكد ان الطاقم الطبي اللي كان مكلف بالعلاج ديالو كان عليه يرد البال حيث بانت هذه الأعراض.

طبيب التشريح الثاني اللي شارك فتشريح جثة مارادونا، والاسم ديالو فيديريكو كوراسانيتي، قال ان اسطورة الأرجنتين وبطل مونديال 1986، “عانى من عذاب شديد”، وان هذا الشي ما كانش “مفاجئ أو ماشب متوقع” وانه “كل ما كان عليك فعله هو وضع إصبعك على ساقيه ولمس بطنه واستخدام سماعة الطبيب والاستماع إلى رئتيه، والنظر إلى لون قنانفو”، وقال انه فالتشريح، ما لقاوش “كحول أو مواد سامة”، وحتى هو قال ان “حجم القلب كان دوبل وزن قلب الشخص البالغ الطبيعي تقريبا”، وكمل وقال ان حجم المخ كان أكثر من المعدل الطبيعي، وحتى الريات ديالو كانو يجوجات عامرين بالما.

وكايتحاكم قدام القضاء بالأرجنتين بتهمة “احتمال القتل العمد” كل من جراح الأعصاب ليوبولدو لوكي، والطبيبة النفسية أگوستينا كوساتشوف، والمعالج النفسي كارلوس دياس، والمنسقة الطبية نانسي فورليني، ومنسق الممرضين ماريانو بيروني، والطبيب بيدرو بابلو دي سبانيا والممرض ريكاردو ألميرو، وكايواجهو احكام بالحبس كاتوصل مدتها بين 8 إلى 25 عام.