عفراء علوي محمدي- كود//

هذي تقريبا شهر، السفارات والقنصليات الأوروبية فالمغرب كتنظم رحلات بحرية من المغرب لأوروبا لإجلاء الأوروبيين اللي حاصلين عندنا، تدارت مجموعة من الرحلات الاستثنائية اللي استهدفات بالدرجة الأولى صحاب الطوموبيلات وليكارافان اللي ماقدروش يرجعو لبلاداتهم فالطيارة.

فتصريحو ل”كود” قال عبد الرحيم راشدي، رئيس مصلحة المراقبة الصحية بميناء طنجة المتوسط، ومنسق مصالح المراقبة الصحية بجهة طنجة تطوان الحسيمة، أن هذ الرحلات استفدو منها 17 ألف واحد كانو حاصلين فالمغرب، وهوما اللي عندهوم باسبورات أوروبية أو بطاقة الإقامة فأوروبا، وأكد أن أغلبهم من أصول مغربية.

وكشف راشدي أن الرحلات كتنطلق من ميناء طنجة المتوسط نحو 5 مدن، “لإسبانيا كاينين رحلات من طنجة للجزيرة الخضراء أو لمالاكَا، أو برشلونة، ولفرنسا كاينة رحلة من طنجة لسيت، ولإيطاليا كاينة رحلة لجينوفا”، على حساب هضرتو.

وقال أن الباطويات المغربية كتلتزم بالإجراءات الوقائية لتفادي انتقال عدوى فيروس كورونا المستجد، من خلال فرض الفحص الطبي للمسافرين فالميناء قبل ولوح الباخرة فمحطات السيارات والراجلين، بالإضافة لإجراءات أخرى داخل الباخرة من تعقيم والحفاظ على التباعد الاجتماعي من خلال فرض احترام المسافة القانونية. وأكد أن هذ المراقبة كتكون بالتنسيق مع الجانب المغربية والأوروبي.

وبالنسبة لانطلاق الرحلات البحرية الدولية، كيقول راشدي أنه لحد الساعة ماعندهم حتى تعليمات، ودابا الميناء خدام غير على رحلات العالقين الأوروبيين، بالإضافة لأنه كيقوم بتغيير أطقم البواخر، على ما يخرج قرار الاستئناف اللي غيكون غالبا بعد الحجر الصحي، كيف قال.