كود سبور //

فنهارو الرابع من النسخة 35 ديال رالي “Aïcha des Gazelles” بدا السباق، فواحد الأجواء عامرة بالحماس، والانطلاقة كانت من مدينة نيس الفرنسية نهار السبت 28 مارس 2026، بمشاركة 160 فريق نسوي جايين من 7 دول مختلفة.

هاد الرالي اللي ولى واحد من أبرز التظاهرات الرياضية ديال العيالات فالعالم، كيعتمد على فكرة مختلفة: ما كاين لا GPS لا تكنولوجيا حديثة، غير البوصلة والخريطة، والهدف هو توصل لنقط المراقبة بأقل مسافة ممكنة، ماشي بأقصى سرعة.

من بعد الفحوصات التقنية، المشاركات شدّو الطريق لمغرب، ووصلو لطنجة، ومن تما غادي يدوزو لمكناس وأرفود، قبل ما يدخلو فالمغامرة الحقيقية فالصحراء، خصوصاً فمناطق بحال محاميد الغزلان ومرزوكة، فين كاين المخيم الرئيسي.

الرالي غادي يدوم 9 أيام، مقسم لستة المراحل، وكل مرحلة كتطلب تركيز كبير، حيث التحدي ماشي فالسرعة ولكن فالدقة، الحساب، وحسن التوجيه، وهاد الشي كيخلي من الرالي “مدرسة ديال الصبر والتحدي”، كيفما وصفوه بعض المشاركات.

الفُرق كيتوزعو على عدة فئات، من بينها طموبيلات 44x، الكواد، طموبيلات الضو، وحتى الكروس أوفر، فتنوع كيبين كيفاش المنافسة كتتطور مع الوقت، مع الحفاظ على الروح الأصلية ديال الرالي.

المنظمة ديال الحدث، دومينيك سيرا، عبرات على الامتنان ديالها للدعم الملكي، وأكدات أن جميع الشركاء مجندين باش ينجحو هاد التظاهرة الدولية، اللي كتعطي صورة زوينة على المغرب كوجهة سياحية ورياضية.