كود – أزيلال //

استقبلات المؤسسات الصحية بإقليم أزيلال لبارح  ربعات الحالات ديال تسمم بغاز أحادي أكسيد الكربون، توزعات بين المركز الصحي بواولى والمركز الصحي بأنركي، وزيد عليهم جوج حالات أخرى تسجلات فالمستشفى الإقليمي بأزيلال.

وحسب معطيات مندوبية الصحة والحماية الاجتماعية، المستشفى الإقليمي سجّل تاهو  15 حالة تسمم فالفترة الممتدة من نهار الجمعة اللي فات حتى لنهار الإثنين 15 دجنبر 2025، الحالات جاية من أزيلال المركز (10 حالات)، ومن تامدة نومرصيد (حالة وحدة)، وآيت ماجضن (حالة وحدة)، وآيت محمد (حالة وحدة)، وأوزود (جوج حالات).

وأكدات المندوبية أن جميع الحالات تلقات العلاجات الضرورية فظروف صحية مزيانة، وما تسجلات حتى حالة وفاة الى حدود لبارح اتنين.

وكيرجع سبب هاد التسمم بالأساس لإستعمال  غير الآمن لأجهزة التدفئة وتسخان الما بالغاز، وزيد عليها وسائل التسخان التقليدية بحال الكانون، خصوصاً فحالة غياب التهوية وعدم احترام شروط السلامة

وفهاد السياق، دعات مندوبية الصحة والحماية الاجتماعية المواطنين فجهة بني ملال خنيفرة  يردو البال، ويحترمو تعليمات الاستعمال، ويقلبو الشوفاج مزيان ويهويو الديور والشراجم ، وما ينعسوش والشوفاج ولا الكانون شاعل، ويتوجهو مباشرة لأقرب مؤسسة صحية أو  يعيطو بـ المركز المغربي باش يحاربو التسمم على الرقم 0801000180 فحالة الشك فأي تسمم.