كود – وكالات//

مات 15 الحاج الاثنين فشرق الهند، مني كانو ناويين يجيو طقوس و يصليو  للإله الهندوسي شيفا.

الحادث اللول وقع فمدينة تارابيث، فولاية البنغال الغربية، بعدما شعلات العافية وسط لوطيل وقتلات 8 الناس، وحسب السلطات، الضحايا كانو حجاج جاو للمدينة المقدسة باش يصلّيو فآخر نهار اثنين من شهر شرافان، اللي عندو قديستو عند الهندوس.

أما الحادث الثاني فوقَع فولاية بيهار المجاورة، وسط معبد أشوك دهام بمنطقة لاخيساراي، فين تجمع عدد كبير من المصلّين لإحياء طقوس مرتبطة بشيفا ، الزحام اللي وقع  خلّى 7 الحجاج يموتو، و19 آخرين يتجرحو.

وحسب السلطات المحلية، التدافع بدا من بعد ما انتشرت إشاعة كتقول بلي بوطو ديال ضو طاح على المصلّين وسط المعبد، الشي لي خلا الروينة وسط الحجاج.

رئيس حكومة ولاية بيهار، علن أن عائلات الضحايا غادي تستافد من تعويضات ديال  3600 يورو لكل عائلة.

وفشهر شرافان، كيتوافدو ملايين الهندوس كل عام على المعابد المخصصة لشيفا فمختلف مناطق الهند، فـطقوس دينية كتجيب أعداد كبيرة من الحجاج.