كود – وكالات //

زار البابا ليو 14 فإطار الجولة الرسولية ديالو فإسبانيا هاد ليامات، برج يسوع المسيح، اللي كيتعتبر أعلى برج فكنيسة الساغرادا فاميليا، بعلو كيوصل لـ172.5 متر ،البرج دشنو البابا وزاد ليه صليب كبير كيبان من بزاف ديال بلايص فالمدينة وكيشرف على برشلونة كاملة.

هاد الزيارة تزامنات حتى مع الذكرى المئوية لوفاة المهندس الشهير أنطوني غاودي، اللي صمّم هاد المعلمة .

أما الساغرادا فاميليا، هي كنيسة كاثوليكية معروفة عالمياً وكاينة فقلب برشلونة ،بدا البناء ديالها ف 1883 ومازال خدام حتى لدابا، يعني داز عليها أكثر من 144 عام وهي كتتبنى ،“غاودي“ صمّمها بطريقة معمارية  كتجمع بين الطراز القوطي والحداثي، واستوحى بزاف من التفاصيل ديالها من الطبيعة.

غاودي كرس حياتو كاملة تقريباً لهاد المشروع حتى توفى ف 1926، ومن بعدو كملو مهندسين آخرين الخدمة باش يحققو الرؤية ديالو. الكنيسة كتضم 18 برج وثلاث واجهات مختلفة فالتصميم ديالها، وهي مصنفة فالتراث العالمي ديال اليونسكو.
ومن المنتظر يساليو الأشغال فيها بشكل كامل عام 2035، و كيزورها كل عام خمسة المليون  واحد من مختلف أنحاء العالم.