كود -وكالات //

كتب الرئيس الأمريكي فحسابو أن إيران إلى زرعات الألغام فمضيق هرمز وما تحيدوش دغيا، فالعواقب العسكرية عليها غادي تكون “ممسبوقاش” ، وزاد فالتدوينة ديالو أنه إلى تحيدات هاد الألغام فهاد الشي غادي يكون “خطوة كبيرة فالطريق الصحيحة”.

وفهاد السياق، قال شون بارنيل لي كيهضر باسم وزارة الدفاع الأمريكية (البنتاغون) ان تقريبا 140 عسكري أمريكي تصابو  فالعشرة أيام اللولين مني بدات العملية العسكرية.

ومن جهتها، قالت شبكة CBS News فمعلومة نشرتها على منصة “إكس”أن أجهزة الاستخبارات الأمريكية رصدات مؤشرات كتدل أن إيران عندها ألغام بحرية فمضيق هرمز ما بين 2000 و6000 لغم.

وبحسب بيانات تتبع حركة السفن، بان اليوم الثلاثاء أن ناقلة نفط كبيرة كانت هازة مليوني برميل من النفط الإيراني دازت من مضيق هرمز نهار 9 مارس، مع خمسة السفن أخرى على الأقل كانت كتصدّر النفط طريق آسيا من28 فبراير.

فالأيام الأخيرة وخا الضربات الأمريكية والإسرائيلية اللي بدات فـ28 فبراير، واصلت إيران تصدير النفط والغاز والمنتجات البترولية من هاد الممر البحري ، حيث كيتقدّر أنها صدّرات على الأقل 11 مليون برميل من النفط الخام مني بدات الضربات.