سعيد بوناصر-كود//

فتحات عناصر الشرطة القضائية فبركان، تحقيق فقضية كبيرة البطلة ديالها سيدة ومجموعة دناس أخرين، وهمو مجموعة دشباب فبركان وزايو، بلي يقدرو يضبرو عليهم، فكونطراطات وفيزات دلخدمة ديال فرنسا.

لحدود الساعة 13 ضحية لي دارو شكاية ديالهم ضد السيدة لي فعمرها 43 عام، كاتسكن فمدينة سلوان بإقليم الناظور، حيث وهماتهم بلي تقدر تصيفطهوم يخدمو ففرنسا بكونطراطات وفيزات، إلا أن المدة الطويلة لي داتها وهي كتجرجر فيهم، عاقو بلي مكاين لا خدمة ففرنسا ولا هم يحزنون.

القضية فيها واحد الكوبر لي كان كيتوسط بين الضحايا والسيدة لي نصبات على الشباب، وكيشجعوهوم باش يعطيوها فلوس، تقدرات بكثر من 10 دلمليون لكل واحد فيهم.

البوليس ستامعو للضحايا كلهم، لي أكدو بلي السيدة وراتهم الكونطراطات دلخدمة، قبل ما يكتاشفو بلي دوك لوراق كلها معندها علاقة بلكونطرات دلخدمة ففرنسا.

ولحدود الساعة السيدة مزال ما تشدات، فحين كاين فرضية كتقول بلي العدد ديال الضحايا لي مزال ما داروش شكاية يقدر يرتافع فلمدة لي البوليس دايرين خدمتهم.