أميمة عطية – كود كازا ///

نددت المجموعة النيابية لتحالف اليسار بما وصفاتو بـ“قمع حقها فتناول الكلمة” في الجلسة العمومية لي كانت مخصصة لانتخاب رئيس مجلس النواب، نهار الثلاثاء 13 أكتوبر 2026، واحتجت حيت ماحسبوش الأوراق البيضا اللي عطاها نوابها ولي كتعبر عن الامتناع عن التصويت.

وحسب بلاغ توصلات به “كود” وتتوفر على نسخة منو، فالمجموعة النيابية وضحات أنها اختارت الامتناع عن التصويت انسجاما مع الخط السياسي والمرجعية الديمقراطية والتقدمية ديال التحالف، وهادشي حسب تعبيرها ما هو إلا تأكيد على استقلالية القرار السياسي ديالو ورفض الانخراط فـ“اصطفافات ظرفية” ما كتنسجمش مع استراتيجية النضال الديمقراطي والمشروع المجتمعي اللي كيدافع عليه.

وشدد تحالف اليسار فبلاغو ، على أن الامتناع عن التصويت ماشي موقف ديال الحياد، وإنما تعبير عن رفض الاختيار بين جوج مشاريع، كيعتبر أن حتى واحد فيهم ما كيمثلش أفق التغيير الديمقراطي والتقدمي اللي كيناضل عليه الشعب المغربي.

وفبلاغو، هاجم التحالف ما وصفو بـ“الدكتاتورية العددية الفاقدة للمشروعية السياسية”، معتبرا أن فرض المرشحين بهاد المنطق ما كيعطيش، حسب موقفو، مشروعية سياسية ديمقراطية للعملية الانتخابية.

وفالسياق نفسو ، نددت المجموعة النيابية بما اعتبراتو “ردة ديمقراطية”، وحملات الرئاسة المؤقتة لمجلس النواب المسؤولية على عدم احتساب الأوراق البيضاء ديال نواب التحالف كتعبير عن الامتناع عن التصويت، وفق ما جاء فالبلاغ.

واعتبر التحالف أن هاد الإجراء كيساهم فإضفاء ما وصفو بـ“مشروعية مزيفة” على العملية الإجرائية، وزاد أدان منع المجموعة من تناول الكلمة فإطار نقطة نظام خلال الجلسة المخصصة لانتخاب رئيس المجلس.

وختم تحالف بيانو، بالتأكيد على أنه باقي غادي يكمل فممارسة معارضة ديمقراطية مستقلة، ومنحاز لقضايا الجماهير الشعبية، ومدافع على الحرية والكرامة والعدالة الاجتماعية.