كود -مراكش//

طارت نهار لاربعا وزيرة المواصلات الإسرائيلية، ميري ريغيف، للمغرب فـأول رحلة مباشرة تابعة لشركة الطيران “أركيع”، اللي رجّعات الروح للخط الجوي اللي كيربط مباشرة بين مطار بن غوريون ومطار مراكش المنارة، وهادشي من بعد ما تقطعو هاد الرحلات لمدة تلت سنين بسبب الأوضاع الأمنية اللي عرفتها المنطقة من أكتوبر 2023.

وحسب المعطيات اللي خرجت من المكتب ديالها واللي نقلها موقع I24 العبري, ريغيف ما سافراتش بوحدها، كان معاها وفد رسمي كيضم المدير العام د الوزارة موشيه بن زكين، ومدير هيئة النقل العام عيدان موعاليم، والمستشارة ديالها رعوت، وخا المكتب أكد بلي هاد السفرية هي “زيارة خاصة” (عطلة شخصية للوزيرة اللي عندها أصول مغربية)، فمن المتوقع تبقا الطيارة والوفد فـالمغرب حتال نهار الاثنين 24 أغسطس، وهادي هي المرة التالتة اللي كتزور فيها ريغيف المغرب (البلاد فين تزاد باباها)فـالولاية الحكومية الحالية ديالها.

وفـبيان خرّجو الناطق الرسمي بلسان الوزيرة ريغيف، قال بلي الرجوع ديال الرحلات المباشرة لمراكش ماشي غير خطوة تقنية، ولكن كيرمز لخطوة جديدة فـالرجوع للحياة الطبيعية، وفتعزيز العلاقات والروابط الجوية والإنسانية بين إسرائيل والمغرب فـإطار اتفاقيات أبراهام.