كود – وكالات //

فتطور علمي جديد فمجال منع الحمل عند الدكور ، العلماء فجامعة كورنيل جربو دوا سميتو JQ1 على الفيران، ولقاو أنه كيوقف إنتاج الحيوانات المنوية بشكل مؤقت بلا ما يأثر على الهرمونات.

هاد الطريقة كتخدم ببلوكاج مرحلة مهمة فعملية تكوين الحيوانات المنوية، واللي سميتها الانقسام الاختزالي، ملي كتتوقف هاد العملية، الجسم ما كيبقاش كينتج حيوانات منوية طرية، الميزة الكبيرة هنا هي أن التأثير ديال الدوا قابل للعكس، يعني ملي كتحبسو الجسم كيرجع يخدم بشكل عادي.

فالتجربة الفيران خداو الدوا لمدة 3 سيمانات، ومن بعد ملي وقفوه رجعات الخصوبة ديالهم ف 6 سيمانات، وقدرو يتكاثرو ويولدو فيران بشكل عادي وبصحة مزيانة عند الصغار ، حتى الفحوصات ما بينات حتى شي أضرار كبيرة على الأعضاء بحال الكبدة والكلاوي.

وخا هاد النتائج المزيانة ، العلماء كيقولو أن الدوا مزال  ما صالحش للاستعمال عند البشر بسباب بعض الآثار الجانبية، ولكن كيبقى خطوة مهمة فالبحث العلمي، و دابا كاينة الخدمة على تطوير أدوية جديدة بنفس الفكرة ولكن أكثر أمان.

إلى نجحات هاد الأبحاث، ممكن فالمستقبل نشوفو وسائل منع حمل للرجال بحال البراوات و الكينات، وهاد الشي غادي يعاون فتحمل مسؤولية الإنجاب بين الرجال والعيالات.