گود سبور//

ما كاينش النجم الشاب المغربي-الإسباني تياگو بيتارش فلاليست ديال المنتخب الاسباني الاول، اللي تعلن عليها صباح اليوم الجمعة.

جريدة “ماركا” كشفت ان تياگو بيتارش اللي مازال ما حسم القرار ديالو بخصوص المنتخب اللي غادي يلعب معه واش المغرب أو الصبليون، نزّلوه من المنتخب الإسباني لاقل من 20 عام اللي كان شارك معه فمونديال الشباب إلى المنتخب الإسباني لاقل من 19.

تياگو بيتارش هو لاعب مغربي-إسباني عندو 18 عام، كايلعب مع ريال مدريد الإسباني، وبين إمكانيات واعرين، ومتنافس الخدمات ديالو المغرب وإسبانيا.