كود – طنجة //

بينات دراسة داروها باحثين من كلية الطب والصيدلة بجامعة عبد المالك السعدي فطنجة على علاقة قوية بين الفاست فود  والسرطان خصوصاً ديال القولون والحجر اللي كيتشخّص قبل  الخمسين.

الدراسة تنشرات فشهر فبراير فمجلة “التغذية السريرية” ESPEN، وأكدات باللي الناس اللي كياكلو الماكلة الزربانة كثر من ثلاث مرات فالسيمانة كيكون عندهم خطر أكبر يتقاسو بسرطان القولون والمستقيم، خصوصاً عند الشباب.

وحسب نفس الدراسة سرطان القولون والمستقيم  ولى منتشر فالعالم كامل، وحتى فالمغرب وهاد الشي مرتبط بالتغييرات اللي طرّات على النظام الغذائي، بحال التكتار من الماكلة الواجدة والمصنّعة اللي عامرة سكار، واللحوم الحمرا كونصيرفي والدهون الشبعانة.

باش يتأكدو من العلاقة بين الماكلة السريعة والسرطان، دارو الباحثين دراسة مقارنة على 616 واحد منهم 308 مريض بسرطان القولون والمستقيم و308 أشخاص صحاح ،وقيّمو العادات الغذائية ديالهم باستبيان خاص، ومن بعد دارو تحليل إحصائيية باش يعرفو واش كاينة علاقة مباشرة بين  الوجبات السريعة و السرطان.

المعدل ديال الأعمار كان تقريباً 55 عام ، والناس اللي قل من 50 عام كانو تقريبا 34% من حالات السرطان، اما سرطان القولون هو لي كتير منتشر بنسبة 58%.

النتائج بيّنات باللي الناس اللي كياكلو الماكلة الزربانة بالكترة، خصوصاً كثر من ثلاث مرات فالسيمانة، كيرتفع عندهم خطر الإصابة بسرطان القولون والمستقيم المبكر. و59% من المرضى الشباب صرّحو أنهم كياكلو الوجبات السريعة بإفراط.

الحاصول ،شددات الدراسة على أن الرجوع للنظام الغذائي التقليدي، اللي فيه خضرة، ديرسير، يقدر يعاون بشكل كبير فالتقليل من خطر الإصابة بسرطان القولون والمستقيم.

https://www.clinicalnutritionespen.com/article/S2405-4577(26)00072-0/abstract?utm_source