كود – وكالات //

كشفات تقارير إعلامية على مْشاورات فإدارة الرئيس الأمريكي دونالد ترامب كتهضر على سيناريوات عسكرية ضد إيران، من بينها خطط لاغتيال المرشد الأعلى الإيراني علي خامنئي وولدو، الذي كيتشاف كخليفة له فسلوم السلطة .

وبحسب ما نقل موقع Axios على مسؤولين أمريكيين، هاد السيناريوهات تطرحات فعلاً وسط خيارات عسكرية قدّمها البنتاغون للرئيس ترامب، وشملات عمليات دقيقة كتستهدف قيادات كبار فالنظام الإيراني، وماشي غير منشآت عسكرية ولا نووية ،مصادر أكدات بلي فكرة قتل خامنئي مطروحة هادي سيمانات وسط دوائر القرار فواشنطن.

و قالت رويترز بلّي الجيش الأمريكي وصل لمراحل هاربة فالإعداد العسكري، وكاينين سيناريوهات خطيرة من بينها تصفية شخصيات كبار فقيادة النظام الإيراني، وحتى احتمال تغيير فهرم السلطة إلا عطى دونالد ترامب الأوامر المباشرة بالتنفيذ.

فالمقابل الإدارة الأمريكية ربطات هاد التصعيد بالملف النووي الإيراني، حيث المفاوضات مازال معطلة بسبب الخلاف على تخصيب اليورانيوم ،واشنطن باغية “زيرو تخصيب”، اما طهران كتشوف هاد الشي مساس بالسيادة ديالها، وخا هكاك مصادر أمريكية هضرات على احتمال القبول بتخصيب رمزي ومحدود، مقابل مراقبة تقنية باش ما يكون حتى توجه لصناعة سلاح نووي فمحاولة باش تفادا الحرب.

ترامب بدورو طلع الخطاب ديالو، وعطا لإيران مهلة بين 10 و15 يوم باش يوصلو لاتفاق، وهدد بعواقب خطيرة إلا فشلات المفاوضات، وصرّح بلّي كيدرس توجيه ضربة عسكرية محدودة ضد إيران، وفنفس الوقت بدات تحركات عسكرية كبيرة فالمنطقة، بحال انتشار حاملات طائرات أمريكية فالبحر المتوسط والشرق الأوسط، كرسالة بلّي الاستعداد العسكري على القرص .

إيران ردات بتحذيرات ووجهات رسالة لــ الأمم المتحدة قالت فيها بلّي أي عدوان عسكري غادي ترد عليه مباشرة، وأن جميع القواعد والمنشآت ديال “القوة المعادية” فالمنطقة غادي تولّي أهداف مشروعة ،وزير الخارجية الإيراني عباس عراقجي أكد حتى هو بلّي أي عمل عسكري غادي يعقّد فرص الاتفاق، ونفى تكون طهران مستعدة تقدم تنازلات كبيرة فملف التخصيب.

https://www.reuters.com/ar/world/J3QQ4GTXD5KXZCUGBQFQLLBYJU-2026-02-20