وكالات//

وقع واحد الحدث غريب فمتجر “فاميلي دولار” فبلدة ماركليسبيرغ فولاية بنسلفانيا، بعدما تفاجأ واحد الطفل عندو 11 عام بدبّ كحل كيجري وراه حتى دخل معاه للمتجر.

كان الطفل، كول فريزي، كيتسوق مع باه، وخرج غير شي لحظات لبارّا، وفجأة لقا راسو وجه لوجه قدّام دب كبير.

وقال كول فواحد التصريح لقناة “سي بي إس نيوز بيتسبرغ” بلّي فداك اللحظة حسّ الدب غادي يهجم عليه، وقال: “ظنيت غادي ياكلني.”

وحسب كلامو، الدب بدا كيتبعو، وهداك الشي خلاه يجري بسرعة للداخل وهو كيغوّت ويطلب المساعدة، والدب ما كانش بعيد عليه بزاف، غير نصّ متر.

وأوضح كول أنه قدر ينجا بعدما دار على ليسر فالممر، والدب مشى فالاتجاه الآخر.

وزاد الطفل كيحكي بأنه جرى هو والكاشيير (أمين الصندوق) باش يراقبو شنو كيدير الدب، ومنّي شافو الدب مشى للجهة الخلفية ديال المتجر، هربو للسيارة فالحين.

الكاميرات ديال المراقبة صوّرات الدب وهو داخل كيتشمّس فالممرات، وحتى تزاح فوق الكونتوار وكيقلب فالمكان تقريباً عشر دقايق، ومن بعد خرج بوحدو.