مصطفى الشاذلي – كود سبور//

اللعابة الجداد، لي تعاقدات معهم مولودية وجدة هادي 3 أيام فقط جراو عليهم من الأوطيل في وجدة، لحقاش مسؤولين كراو ليهم غير يومين ماشي ثلاثة.

المسؤولين ديال المولودية كراو لكل من المهدي النغمي ومصطفى اليوسفي ولامين دياكيتي في الأوطيل يومين، في انتظار يكريو ليهم شي دار فين يدوزو العام.

الفضيحة أن اليومين ديال الكرا ولات 3 أيام وعوض يخلصو المسؤولين النهار الزايد دون مشاكل، بقاو كيتاصلو بالرئيس محمد هوار، ولكن التلفون ديالو كان خارج التغطية، وهو ما دفع بصاحب الفندق إلى طرد اللاعبين الثلاثة.

دابا هاد المسؤولين كاملين لي فوجدة واش معندهومش 1500 درهم باش يحلو المشكل بلا فضيحة، ولا حتا هادي يعولو عليها على الرئيس.

المشكل ماكيتوقفش عند هاد الحد، بل هو اعمق، ففريق مولودية وجدة يعاني من أزمة مالية كبيرة، لعابة مامخلصينش من مدة وعطاوهم كمبالات ومكايناش الفلوس وكلشي كيعول على الرئيس في حل كل هاد المشاكل، كانت كبيرة ولا صغيرة.

مصدر من المولودية استغرب في تصريح لـ”كود”، وگال ان هادي شوهة، مسؤولين عندهم الفلوس ولكن ما كيبغيوش يخلصو الريال.