أخنوش تلاقى وزير الاقتصاد والمالية والسيادة الصناعية والرقمية الفرنسي وبحثوا التعاون الثنائي والإرتقاء بالشراكة الإستراتيجية بين الرباط وباريس
كود سهام البارودي ////
حملة مسعورة شنوها شي اتحاديات هاترات على واحد السيدة كايقولو أنه تم انتخابها مسؤولة اقليمية لفرع الاتحاد الاشتراكي فاسبانيا ! و المشكلة انه السبب علاش منوضين هايلالة لا يتطابق و مبادئ الحزب و التوجه ديالو سواديزو ” حداثي تقدمي …”
هاد العيالات لي نورمالمو كاينتاميو لحزب “تقدمي” كايعيبو على هاد السيدة أنها ” عندها حانة ” و ” خدمات فالفريز ” و ” تزوجات بصبليوني” و شي خصوصيات فحياتها ماعند باباهم فيها حتى شي دخل !
و هاهي گاع عندها حانة و من بعد واش الحانة ماشي استثمار ؟ تجارة ؟ عمل ؟
واش كنتو كاتفضلو يكون عندها محل ديال بيع النقاب و الاشرطة الدينية باش تجيكم على الگانة؟
و هاهي كانت خدامة فالفريز و تزوجات بسبليوني و من بعد؟
و هاهي” بارميطة “؟ و شنو المشكل ؟ شنو لي فهادشي يمكن يمنعها أنها تدخل غمار السياسة و تمارس نشاط سياسي و تولي مسؤولة على حزب ؟ و تولی گاع رئيسة ديال حزب سياسي ؟
علاش البارميطات و عاملات الفريز و صحاب الحانات ماشي من دوك القوات الشعبية لي الاتحاد الاشتراكي للقوات الشعبية كايدافع عليهم ؟
راه الشوهة الحقيقية للاتحاد الاشتراكي هوا يكونو فيه فحالكم ! فحال هاد ” المناضلات” لي كايحلو فمهم تال الودنين باش يدافعو على ” المرأة ” و حقوق المرأة و وضعية المرأة و هوما أكبر عدو للمرأة فالواقع ! الشوهة الكبيرة للاتحاد الاشتراكي هوا النساء ديالو يسكتو على هاد الاهانة لي تعرضات ليها وحدة منهم بسباب المهنة ديالها و يطبعو مع هاد الممارسات القروسطية.
أنا شخصيا كانشوف بلي فقصة هاد السيدة ( لا كانت القصة لي كايعاودو عليها حقيقية) كفاح و طموح ماعندش أغلب هادوك لي كايكريتيكيوها ! و لا كانت بصح من عاملة فالفريز قدرات تولي صاحبة حانة فاسبانيا راه برافو عليها مرا و نص !
و الطوب هوا الهاترات كايغوتو ” واك واك كيف يعقل تولي مالكة حانة مسؤولة في حزب المهدي و عمر”
و نساو واقيلة بلي المهدي لي كايدويو عليه آخر بلاصة تشاف فيها هي براسري ليب ! ماشي جامع باريس ! براسري ليب آ الهاترة منك ليها