كود هناء ابو علي ///

فزمن تزيار السمطة ولمغاربة كيعانيو مع ارتفاع اسعار المازوط وما بقاوش قادرين يركبو على طونوبيلاتهم خرج موكب وزير العدل الامين العام لحزب الاصالة والمعاصرة عبد اللطيف وهبي فاحد المناطق الافقر فالمغرب. الفيديو تصور فتيلوكيت باقليم ازيلال والمناسبة كانت تدشين محكمة جديدة ببزو واخرى مؤقتة بتلوكيت. 

الحدث مهم ومهم بزاف لمواطنين كانو يتعذبو باش يمشيو للقضاء. دابا قربات منهم المحكمة لكن التدشين المهم غطى عليه الشكل. الشكل مهم بزاف فالعمل السياسي. يمشي وزير بموكب فيه 30 طونوبيلة او اكثر راه فضيحة. 

صحاب وهبي غاديين يخرجو ويقولو راه الوزير كان معاه القضاة اللي تعينو والسلطات ووو.. وباللي هو كان راكب غير فطونوبيلتو. هاد لكلام مردود على واحد جاي من اليسار وكيقول باللي كيعرف يدير السياسة. هاداك الكورطيج محسوب علي الوزير واخا يكون فيه الوالي والعامل ووو. حتى رسميا فالتلفزيون او فوكالة الانباء الرسمية كيقولو دشن وزير العدل. يعني المجد ديال التدشين لمحكمة واخا كاينة استقلالية السلطة القضائية وما عندها علاقة دابا بالوزارة٬ غادي يكون لوهبي. 

الكورطيج هو المسؤول عليه. كان يعطي رسالة واعرة لو خدا مبادرة ذكية. يديرو طوبيس كبير. او ميني بيس. هو السياسي يلقى شي حل ماشي صادم فزمن صعيب غادي فيه ليصانص ومازوط ل20 درهم