كود هناء ابو علي ///

تصرفات عبد اللطيف وهبي الامين العام لحزب الاصالة والمعاصرة الغريبة المتناقضة كانت كلها فصالح حزب التجمع الوطني للاحرار. وهبي هاجم اخنوش فاكثر من مناسبة. اتهم فتصريح لوكالة الانباء الفرنسية ان الدولة كتشوف ففلوس هاد الحزب كتوزع بشكل كبير.

باش تعلن على النتائج قال باللي اتصل بعزيز اخنوش رئيس التجمع الوطني للاحرار. ما عندوش لوجه وصافي. وهبي كان السبب فبيان دارو حزبو مع 4 احزاب اخرى ضد الاحرار ايام الحملة الانتخابية. وهي احزاب العدالة والتنمية والحركة الشعبية والاتحاد الدستوري والتقدم والاشتراكية. هادو اللي بغاو يضربو الاحرار وبالضبط اخنوش٬ عاونوه. حقاش حزبو بعد ما يكلفو الملك بتشكيل الحكومة٬ غادي يكون عندو ساهل يدير تحالف فيه هادوك اللي بقاو بعاد من هاد الصراع وهما حزبا الاستقلال والاتحاد الاشتراكي.

بعملية حسابية هاد الاحزاب الثلاث عندها 219 مقعد فالبرلمان من اصل 395 وهي اغلبية مريحة وبزاف. الباقي بيما فيهم البام والحركة الشعبية يمشيو يديرو المعارضة.

احزاب 3 ممكن تقوي التماسك الحكومي وممكن تخلي رئيس الحكومة يختار عدد قليل من الوزراء باش تكون الفعالية فالخدمة وهاد الشي هو السبيل الوحيد لخلق نتائج فاقرب وقت وتحقيق كاع المشاريع اللي سبق وعلنو عليها.

طبعا كاين بياين بعض المرات كبير بين برامج هاد الاحزاب الثلاث ولكن مع المفاوضات يتوصلو لحلول.

عزيز اخنوش فلقاؤو الصحافي البارح فمقر حزبو قال باللي الاحرار “مستعد للعمل بثقة ومسؤولية مع كل الأحزاب التي تتقاطع معه في المبادئ ورؤى البرامج لرفع مختلف التحديات تحت القيادة الرشيدة لصاحب الجلالة الملك محمد السادس”.

واوضح ان “البرنامج الانتخابي للحزب الذي يضم خمسة التزامات و25 إجراء، سيشكل قاعدة المفاوضات مع الأحزاب الوطنية في سبيل بناء أغلبية قوية ومنسجمة تُحدث قطيعة مع الماضي وتجمعها رؤية موحدة وبرنامج حكومي طموح يتماشى مع رؤية جلالة الملك وتطلعات المغاربة”.

وكان و اضح باش قال باللي هدف حزبو “تكوين أغلبية رصينة قادرة على تفعيل التوجهات الكبرى والمشاريع المهيكلة التي أطلقها جلالة الملك وقادرة على استكمال مسار التنمية تحت قيادة جلالته الضامن لنجاح التجربة الديمقراطية في بلادنا”.

هاد لكلام ما يمكنش يكون فيه حزب بحال البام اللي دار حرب كبيرة بزاف علي الاحرار من فترة. ما خلاو فيها مؤسسة جود ولا الهجوم الشخصي ولا المشاركة بشكل باين قبل سنوات فحملة المقاطعة…. يعني وجود البام فالحكومة الجاية غادي يكون مؤشر خايب