كود الرباط//

ادريس لشكر اللي جابو الياس العماري لرئاسة حزب الوردة ودخل بزز للحكومة فسابقة فتاريخ الحكومات فالمغرب٬ كيطنز علي لمغاربة. لشكر اللي بحالو كرهو لمغاربة فالسياسة باغي مناصب حكومية جديدة فالتعديل الجديد اللي كان دعا ليه الملك وطلب من رئيس الحكومة يجيب كفاءات.

لشكر عارف ما عندو كفاءات وطبق اش قالو ليه وقال خاص استقطاب نخب جديدة من خارج الحزب. هو جرا على الاطر المزيانة بفضل طريقة تدبيرو للحزب وما كيحشمش باغي يجيب اطر جديدة.

لشكر كيعرف ينوعر سياسيا. قال باللي خاص الحزب يجيب بروفيلات قافزة ويقتارح الاطر. فالعمق باغي يحقق اللي فشل فيه فحكومة بنعرفة وهو تعيين بنتو خولة لشكر. هاد البنت كان اقتارحها ولكن دار عليها بنكيران فيطو واستمر الفيطو مع بنعرفة وما حلماش بيها.

تقدر تكون خولة فعلا كفاءة ولكن بنت ادريس لشكر وتاريخو فالتنوعير السياسي كافية تمنع وصولها للمناصب العليا٬ على الاقل حتى يختافي بوها من الساحة السياسية.

دابا التخربيق ديال تشكيل بنك للمعطيات لبروفايلات قافزة غير طريق باش بنتو تولي وزيرة.