الرئيسية > آراء > وناري گولو للزعيترات يبعدو على الصحرا. كيفاش كيهينو هل التراب بهاد التظاهرات الخاوية وها بحالاش كنعطيو الاوكسجين للبوليساريو اللي كلات لعصا بزاف
06/11/2019 11:00 آراء

وناري گولو للزعيترات يبعدو على الصحرا. كيفاش كيهينو هل التراب بهاد التظاهرات الخاوية وها بحالاش كنعطيو الاوكسجين للبوليساريو اللي كلات لعصا بزاف

وناري گولو للزعيترات يبعدو على الصحرا. كيفاش كيهينو هل التراب بهاد التظاهرات الخاوية وها بحالاش كنعطيو الاوكسجين للبوليساريو اللي كلات لعصا بزاف

كود علي الصافي العيون ////


اليوم الاربعاء سادس نونبر اللي هو عيد المسيرة الخضرا غادي يجيب ابو زعيتر اللي ما عارفيش لمغاربة حتى الرياضة اللي كيديرها للعيون باش ينظم لقاء فالكورة مع كاع هادوك اللعابة اللي سالاو الكورة وقلبوها استرزاق اللي عطاهم كثر يمشيو عندو. معاهم غاديين يكونو شي فنانة غالبا من مصر وشي مغاربة.


واش بهاد الشي باغيين نقضيو على الانفصال. اش هاد التخربيق.

اولا شكون هاد ابو زعيتر اللي داخل البارح لحفل تنظم على شرف هاد النجوم بمراكش٬ بحال مول الشي. منين خرج لينا هاد لبنادم هو وعائلتو.

كتبنا ف”كود” العام اللي فايت. بحال ابو زعيتر خاصهم يبعدو على الصحرا. على العيون. راه هاد الشي ماشي فصالح قضية لمغاربة الاولى، قضية اللي ضحاو فيها كاع لمغاربة باش كان هاد بوزعيتر عايش فلالمان.


هاد العام القضية مختالفة اكثر. ابو زعيتر وهاد الحدث اللي عطاوه ليه ووجدو ليه كاع لفلوس وكلشي تابعو كيسيء للصحرا. كيسيء ليها باش كيجيب هاد النجوم اللي طفاو يباتو فمراكش ونهار الماتش يحضرو يلعبو ويرجعو. اساءة كبيرة لهل التراب. لسكان المدينة. ما كيدورو ما كيدوزو الليلة فصحراءها وكاينة الامكانيات يديرو ليهم ليلة واعرة. فقط يتصورو ويرجعو.

واش هاد التصرف هو اللي غادي يغير عدد من مواطني العيون اللي عندهم تفكير انفصالي. ابدا. بل بالعكس هاد المبادرة اللي دايرها هاد خينا كتعطي نتائج عكسية. راه ناس الصحرا باش يشوفو الرايات مرفوعة بطريقة مبالغ فيها وكتهين الذكاء ديالهم كيتقلقو.

القضية الاخرى هي ان هاد الماتش جا فوقت واعر للمغرب. كيفاش جا تقرير اممي فصالحنا وضربات البوليساريو والجزائر فقضية تمديد مهمة المينورسو اللي انتاقلات من 6 اشهر الى 12 شهر. ثم جات قضية حقوق الانسان. قادة البوليساريو كلهم طلعو جلادة قتالة حقراء. قناة “الغربية” على الواتساب فضحات كلشي. شهادات صادمة لصحراويين على التعذيب فتندوف وراها كل من البشير مصطفى السيد وابراهيم غالي ….دابا بحال هاد القضية كتعطي الاوكسجين للبوليساريو اللي مخنوقين.

هاد ابو زعيتر اش دار للمغرب ولا للعيون باش ينقص الانفصال باش ما يبقاش يتحرق العلم المغربي كيف كان نهار فازت الجزائر بكأس افريقيا للامم اخيرا. واش دار شي نادي رياضي فالعيون؟ اللا واش دار شي نادي رياضي بحال ابطال كثار فشي مدينة مغربية اخرى؟ اللا. الحاجة الوحيدة اللي دارها هو مطعم فمارينا بطنجة.

ثم ايلى بغيتو شي منظم لهاد الماتش ما كاين ما حسن من لعاب محترم فالصحرا بحال مبارك بوصوفة. دابا اعتازل وولد التراب وكيعرف العقلية ولا جاب اللعابة للعيون غادي يحتارم السكان.

باراكا من المبادرات يجيو من الرباط. باراكا ماتعتابرو سكان الصحرا بحال الديكور تجيبو ليهم شركات فالتواصل فالداخلة وتاخد المارشيات وكيديرو لفلوس. ونفس الحاجة فالعيون. راه الوعي السياسي كبير بزاف فهاد المنطقة. الناس باغيين الحكم الذاتي وكود باش كتهدر معاهم كيقولو لينا “ما كيساعدوناش بهاد المبادرات. كيدعمو الانفصال اكثر”.

بغينا عيد للمسيرة يشاركو فيه ولاد المنطقة يقودو المبادرات يخرجو يدافعو على الدرابو بوجه حمر. بحال هاد الشي ديال ابو زعيتر اساءة لملف كلشي لمغاربة دفعو ثمن من اجلو.

موضوعات أخرى

29/03/2024 10:00

دقة تابعا دقة فـ”قضية تمويل فرحان” مول الشروق. بوصوف كان غادي يدير درس حسني قدام سيدنا ويقدم كتابو ليه وحيدوه

29/03/2024 09:50

ماتش الكوكب والحسنية.. تابعوه 20 ألف واحد وولاية أمن لمدينة لحمرا سخرات 1270 بوليسي وها شحال تشدو

29/03/2024 09:42

السينمائيون يهاجمون بنسعيد: كاين تراجع فالمكتسبات للي تحققات فحكومات سابقة وخاص حوار جاد ومسؤول باش نتجاوزو الأزمة

29/03/2024 09:15

الوداد طواو صفحة الناصيري وطلعو البرناكي كرئيس 20 فتاريخ النادي ودارو مليون للي بغا ينخرط

29/03/2024 09:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟