اسماء غربي – كود//
جريدة “اسبين دايلي نيوز Aspen Daily News” الامريكية، كتبات فمقالها اللي نشرات ففبراير الماضي، ان المغربي خالد البصري (45 عام) تعتاقل وتم اتهامو بالعنف المنزلي في بتكين كاونتي فولاية كولورادو.
خالد البصري، هو واحد من ولاد دريس البصري، وزير الداخلية السابق، وذكرات الجريدة انه كيضرب مراتو المغربية، ودخلها لسبيطار، ماشي مرة ماشي جوج.
مرات خالد (27 عام) اكدات للبوليس انها جات هي وياه وولدهم لمريكان بفيزا توريست، وحتى وصلو وبلا مايعلمها من قبل قالها انهم غادي يبقاو هنا وغايدفعو اللجوء، وحيت هو ولد البصري غايقبلو الطلب. وبالفعل بقاو عايشين فمريكان وهاد السنين كلها وهو كيسلخ فيها، ومانع عليها اي نشاط خارج الدار، وماخلاهاش حتى تعلم اللغة.. السيدة مكتهدرش الانجليزية ومقطوعة على كولشي، حيت كتفهم غير شوية ديال الفرنسية والدارجة.
شخص من عائلتها عايش فواشنطن، هو اللي اتاصل بالبوليس وفسرلهم القهرة والعذاب فين معيشها البصري.
وبما ان السيدة بقات فمريكان ماشي بخاطرها، بل حيت راجلها بزز عليها اللجوء، وحرمها من الرجوع للمغرب فين عائلتها وحبابها، البوليس عيطو لمحققين ديال الامن الوطني “Homeland Security”، باش يدخلو على الخط، ويديرو خدمتهم.
لحد كتابة المقال، خالد البصري كان كيتسنى محاكمتو فحالة سراح، نهار 3 مارس، ولكن مع كورونا موحال واش يكون تحم عليه، وفالغالب تم التأجيل.
المقال الاصلي:
