سهام البارودي – كود//

للاسف بزاف ديال المغاربة كايجهلو التاريخ و الهوية ديالهم ! و بمقابل الجهل الكارثي بالتاريخ الحقيقي للمغرب كاين واحد الانتشار كبير للافكار الظلامية الاقصائية، هادشي لي كايخلينا نشوفو بعض روابة فاغانيهم كايغنيو على الساطات و الحشيش و الطرف و الفلوس و الجريمة و الزنقة و كايصورو لبنادم بلي المجتمع الزوين لي خاصو يكون خاص يكونو فيه الناس كايصليو و العيالات دايرين الحجاب و مايكونش عندنا مستشار “يهودي” فحالي روج ولد الگرية فالاغنية ديالو الاخيرة ” باسم الشعب” و سماه ب”أغولاي”

دابا رابور مغربي ! كايعتابر راسو فنان ! و عندو شريحة واسعة ديال الجمهور متبعاه اغلبها كاتعيش على الهامش كايسب مستشار ملكي علاش و باش ؟ حيت يهودي ! واش ماشي قمة العنصرية و الاقصاء و الكالاخ ؟

واش هاد الرابور ماخاصوش لي يدير ليه محو الأمية فتاريخ المغرب ! ماعارفش بانه اليهودية جزء من الهوية المغربية المختلفة و الغنية و لي مذكورة فالدستور ؟! علاش واش المغاربة كلهم مسلمين آ سيموحمد ؟ علاش ماعاشوش يهود فوق هاد الارض قبل مايبان الاسلام گاع ؟ ماعندهمش الحق لي عندك نتا فهاد الارض ؟! مادفنوش جدودهم فيها ؟ ماعندهمش قبور ديال الاولياء ديالهم هنا ؟! واش يصحابلك كاين غا نتا و جدودك هنا و لا ؟ المغرب راه مخلط و الهوية ديال المغاربة مخلطة فيها الاسلام و العروبة و الامازيغية و الصحراوية الحسانية و الانتماء الافريقي و ال متوسطي و و و و ! غانلوحو هادشي كامل فالزبل و غانبقاو حنا فالتصور ديالك الضيق لي كايشوف بلي گاع المغاربة خاص يشبهو ليك ! صافا با ؟

راه النقط المشتركة لي كاينة اليوم بين مغربي يهودي و مغربي مسلم اكبر بكثير من النقط المشتركة بين مغربي مسلم و سعودي مسلم ! نتا و اليهودي راه عندكم تاريخ مشترك ! كاتاكلو نفس الماكلة ! كاتصنطو للشعبي و الاندلسي ! كاطيبو الكسكسو ! كاتهضرو بالدارجة….

بهاد الهضرة الخطيرة السيد كايضرب فمبدأ التعايش لي الدول المتحضرة كاتسعى ليه ! وا سيموحمد واش مافراسكش بلي فالدولة الزوينة فحال فاوروبا و ميريكان لي نتا باغي تعيش فيهم و كاتقارن المغرب بيهم الناس لي كايگولو فحال ديك الهضرة لي گلتي كايتحاكمو بتهمة معاداة السامية و كايشبعو حباسات ؟! بلي فالدول المحترمة لي نتا كاتصورها فالاغاني ديالك الناس ماكايعايروش الناس بدياناتهم ؟!

مصيبة هادي مع الجهل !