كود سبور//

قرر الدولي المغربي محسن متولي النجم السابق ديال الرجاء الرياضي يخوض تجربة جديدة خارج المغرب إنطلاقا من الموسم الجاي، بعدما انتهى المشوار ديالو مع الفريق الأخضر.

وتوصل محسن متولي القائد السابق ديال الرجاء بعرض من فريق أهلي طرابلس الليبي، لي باغي الخدمات ديالو، وحسب مصادر مطلعة فاللاعب المغربي والفريق الليبي اتفقو على التعاقد لمدة ديال سنة واحدة.

وكايتعتبر محسن متولي من النجوم لي خلاو البصمة ديالهم مع الرجاء الرياضي فالكرة المغربية، بالألقاب لي فاز بها مع الفريق الأخضر والانجازات لي حققها معها، وأبرزها البطولة فأكثر من مرة وكأس العرش وكأس الكاف والبطولة العربية إضافة لنهائي كأس العالم للأندية، مع العلم أن متولي منتوج خالص لمدرسة الرجاء.