كود احمد الطيب ///

حزب العدالة والتنمية سخسخاتو بحال كاع الاحزاب٬ التسيير. اشرافو على الحكومة ضعفو وتزاد عليه رئيس حكومة بحال بنعرفة٬ هاد الاضعاف كيكون مضاعف. هاد الشي علاش بدات اصوات فالحزب كتقول “واش ضروري يكون المصباح هو الاول فانتخابات 2021 التشريعية؟ يعني ان بعض كبار كوادر الحزب مع ترسيخ التناوب باش ما يخلعوش الخصوم السياسيين ولكن السبب الرئيسي كيف قال ل”كود” قيادي من هاد الحزب “باش العدالة والتنمية ما يوقعش ليه استنزاف”.

القرار صعيب “غير راه عدد من اعضاء الامانة العامة كتفكر فيه ومآمنة بيه٬ غير قدام القواعد يستحيل يقولوه ولا يخرجو يواجهو بيه القواعد” يضيف مصدر “كود”.

حسب معطيات حصلت عليها “كود” فان محمد الحمداوي ومعاه حتى عبد الاله بنكيران مع هاد الطرح. اي الرجوع الى المعارضة لتقوية الحزب لحمايته٬ وفق نفس المصدر ل”كود”.

ماشي غير هما حتى بعض اشد معارضي بنكيران فالحزب عندهم نفس التفكير غير هما خايفين يقولوها.

المشكلة اللي كتواجه الحزب ايلى كان هاد القرار هو كيفاش يطبقوه٬ واش بعدم ترشيح وجوه الحزب اللي كتجيب 3 او 2 فدوائر فكبريات المدن بحال الدار البيضاء وطنجة ومراكش… او فتقليص المشاركة. فهاد العملية الاخيرة صعيب يقنعو بيها قواعد الحزب٬ لكن مع الاولى القضية ساهلة شوية “ايلى ما رشحناش الشخصيات المعروفة فالحزب غاديين يفقدو حتى ل30 بالمائة من مقاعدنا فمجلس النواب” يوضح قيادي من الحزب ل”كود”.

دابا هاد الشي ديال ذهاب الحزب للمعارضة غادي يبان مع الدخول السياسي الجديد. الملك طلب من رئيس الحكومة يحيب ليه اطر واعرة وقافزة. فحزبو عارف هاد الشي ما كاينش. جاي من بعد المشروع التنموي الجديد اللي غادية توجدو لجنة سيتم الاعلان عنها فالدخول المقبل كذلك. هنا ايلي ما عندش الحزب اطر غادي يكون ليه خيار الذهاب الى المعارضة اسهل واقل الخسائر. ديك الساعة صحاب المصباح عندهم قدرة كبيرة يسوقوها لقواعدهم كيف بغاو.