كود- الرباط//

نشر هاد الصباح مصطفى  الفكاك المعروف باسم سوينكا واحد من مشاهير الانترنيت ف المغرب اللي معروف بفيديوهاته  عبر برنامجه ” اجي تفهم “  و اللي كتبسط و تشرح بعض الظواهر  المجتمعيةو السياسية ، نشر تدوينة مؤثرة و حزينة بزاف على وفاة ابن اخته بسبب اصابته بالسرطان، تدوينة كتعري واقع الصحة ف المغرب  عامة و المصابين بالسرطان خاصة و اللي كايكونو ضحاياه  ناس ماعندهمش امكانيات مادية .

“إنا لله وإنا إليه راجعون
هاد الصباح توفى إبراهيم بعد سنوات ديال المعناة مع مرض سرطان الدم
لله إيصبر الام ديالو فعلا بألف رجل تقتلات معاه بطريقة لايمكن وصفها
عشت معاه رحلت العلاج عن قرب و في قلبي غصة من المنظومة الصحية ديال بلادنا

و انا نعود ليكم علاش

مالي مرض براهيم بدات ليه الام ديالو العلاج في مستشفى الجامعي ديال الدار البيضاء، لأنه الحالة المادية ماتسمحش بشي حاجة أخرى، باه خدام عندو التأمين الاجباري على المرض مع الصندوق الضمان الإجتماعي cnss،
وتكاليف العلاج حتى تتأديهم عاد باش تدفع الملف ديالك باش تعوض فيهم و طبعا هاد العملية تتاخد وقت، إذن خاص ما أمكن تتصقرم باش تقدر تجيبها لاصقة، غير تحاليل ديال الدم لا تعد ولا تحصى .

من بعد وقت ديال التشخيص كبير قررو ايبداو العلاج و لي هو ببساطة إتباع واحد البرطكول معين أي خطوات علاجية مرتبة بالزمن كل مرحلة تدير فيها علاج كيميائي ثم ستراحة ثم علاج وهاكذا حسب ما فهمت

وهاد الطريقة في العلاج مهم فيها جدا إحترام الوقت بين الفترات و المراقبة خاصها تكون فيها دقيقة جدا للطفل، يعني خاص البق ما يزهق.
هادشي طبعا لي قلت هو لي كان خاصو ايكون و لكن الحقيقة فعلا مرة ، ديما البرطكول كان عندو مديكالي بأيام كثيييرة و لعدة اسباب
– ماكينش سرير خاوي في السبطار
– تقطع دواء الكيميائي في المختبر ( سيرو قلبو عليه )
– ما كينش الدم سيرو قلبو عليه ( و هو كان ديما كيخصو ايزيد الدم )
وزيد علا هادشي المعاملة ديال الويل راكم عارفين الوضع ماعندي مانخبي فيه

بعد تسخسيخة كبييييييييييرة دوزت ألام ديالو في السبيطار و كل مرة الحصص العلاجية ديالو كانو تيديكلاو بمدد خيالية حتى تيوصل لمرحلة حرجة عاد باش تي كمل العلاج،
بعد هادشي قالو لينا بالي راه تعالج عن طريق الحصص الكيميائية لي دوز بزز .
وفرحنا فرحة زاااائفة وحنا عارفينها زااائفة و بغينا نتيقو بزز منا لأنه لا حياة بدون أمل وعرفنا أنه علاج مكذوب لأنه كلشي الاطفال لي قبل منو حتى هما قالو ليهم بالي تعالجو و كيعود إيرجع ليهم المرض
و قالت ليا الأم ديال براهيم ولي هي الأخت الشقيقة ديالي ( أنا خال إبراهيم ) أنه قالت ليها أحد الممرضات قديمة تماك أنه حسب لي شافت كلشي الحالات ديال الاطفال كي عود ايرجع ليهم المرض بدون إستثناء ، وأنا شخصيا سولت طبيبة مختصة سؤال واضح
واش عدم إحترام الوقت في العلاج و هاد التفاوت الكبير بين فترات العلاج ايقدر بسببو المرض ايرجع ؟ و الجواب ديالها كان : نعم عندو تأثير كبيييير

هادشي علاش في العادي الاطفال تي تعالجو غير بالكيماوي في العالم كامل ، الى حنا

و فعلا داكشي لي وقع لإبراهيم رجع ليه المرض للأسف، و المشكل ماشي هو هذا حينت كنا متوقعينو المشكل في باش المستشفى ايقول لينا بالي راه جع ليه المرض، هنا جياكم في الكلام

هادشي وقع في صيف العام لي فات شهر 8 بالظبط ، الام ديالو بان ليها الولد تيزراق و كيضعاف و كرشو تضرو ، تيقنت بالي رجع ليه المرض و عاود داتو للسبيطار ، قالو ليها بالي خاصها دير ليه التحليلة ديال العظم ، دارتها ليه و قالو ليها خاصكي تسناي 15 يوم باش نتيجة ديال التحاليل تخرج و من بعد نعرفو اش واقع، دازت 15 اليوم و دري يوم عن يوم حالتو تتزاد سوء فاش جات تشوف اشنو كين قالو ليها بالي خاصها تعود التحليلة ???????? ، علاش الله أعلم و عود مشات خدات ليه تحليلة جديدة و قالو ليها تسنى 15 يوم أخرى و دري كيبان لينا كي موت

وسط هاد حالة الترقب ديال لخ*** ، الأم ديالو قررت أنها ديه لتركية باش إتعالج حينت غير قدرت أنه أكيد العلاج تماك غادي ايكون حسن من هنا، بدون أي سابق تجربة غير حركة ياااائسة أي حاجة حسن من هاد الجحيم لي تتعيش ، و ذاك ما كان ما عارفة واااالو في حتى حاجة ، درنا بحث صغيير في غوغل خترينا السبيطار لي عندو نجوم كثر في الترتيب دغوغل كين في إسطنبول فيه علاج سرطان دم عند الاطفال بكل بساطة ،
دبرنا في فلوس تذاكر ديال الطيارة لي كانت غالية ديك الوقت لأنه صيف، وسافرت هي و إبراهم و بنت أختي أخرى تتكلم التركية بطلاقة لحسن الحظ هي لي غادي تعتق الموقف،
مشاو ما عرفين والو في كلشي داوه لأسطنبول،
مشاو عند داك السبيطار لي لقينا في غوغل
و كيفما تخيلنا السرفيس لاااايقارن بالمغرب في ساعة وحدة دار ديك التحليلة لي كنا تنتستناوها 15 يوم في المغرب، و طبعا قالو بلي رجع ليه المرض و خاصو ايدير حصص علاج بشكل مستعجل ، و لكن خاص تميزيو لفلوس
وهنا سبيطار لي مشينا ليه أعتقد ستغل الجهل ديلنا بشكل كبير و حسب لينا أثمنة مرتفعة على المعتاد في تركية
فقال لينا بلي الدري خاصو ايدير عملية زرع نخاع عظمي و مصاريف العلاج كامل غادي تقام ب 120 الف دولار أمريكي، أي 120 مليون سنتيم مبلغ جد خيالي ، ولكن مقارنة مع الاثمنة لي تتقتارح فرنسا في نفس العلاج تيبقى رخيص
و لكن في مستشفيات خاصة أخرى في تركية تقدر تلقاه بنصف الثمن، وهادشي انا شخصيا مشيت لتماك و درت جولة على المستشفيات الخاصة لأنه كنت باغي نحولو من المستشفى الاول لأنني حسيت بأنهم ستغلو جهلنا ، و لكن خوفونا انه ايلا خرج ايقدر تتضاعف حالتو و صراحة كاملين خفنا من المسؤولية ،
ما علينا ، العلاج لي كان تي تتعاجل أقل ما يقال عليه جد حرفي ، داكشي بالثانية و جزء من الثانية المراقبة دورية و المعاملة جيدة
و مبقاش مشكل ديال سير قلب على الدم .. ماكينش الدواء ..

و درت هنا في الصفحة عندي حملة تربعات و قدرنا نجمعو 80% من المبلغ الحمد لله و درنا ليه العملية وعونتنا جمعية مبادرة لله ايجازيهم خير

في المغرب ديك التحليلة لي بقينا تنتستاو خرجت و فعلا طبيبة ديالو ، قالت بالي غادي تخصو العملية و بلي الحالة ديالو لايمكن علاجها في المغرب و كتبت لينا تقرير بهادشي ، و بفضل مساعدة جمعية heure joyeuse قدرنا نوصلو انه cnss تبغي تعوضنا في مصارف العلاج لي غادي ايدير في تركية يعني 120 الف دولار ، خصنا غير تقرير ديال الطبيبة ديالو تتصرح فيه أنه الطفل لايمكن علاجو في المغرب اي ديجا عدنا، ايكون مختوم من عند مندوب وزارة الصحة ، لي مشينا عندو و مبغاش ايختم لينا على التقرير و قال بلي خاصو ايشوف الدري ، وحنا تنقلو ليه راه السيد في التركية كون خليناه تتشوفو كان راك تتشوفو في القبر ، و هو تيقول ماشغليش هذا القانون وزاد كره جدي ، و لحد الان الأمور واقفة عندو باش نتعوضو في الفلوس ( لي كنا بغينا نعطيو جزء مهم منهم لي مريض أخر ايتاعلج )

دار براهيم العملية و الحمد لله قالو لينا نجحت
و باش نقصو المصارف

والام ديالو صوبت الاقامة و قدرات تبع ليه في مستشفى عمومي لانه من بعد العملية تتبقى مدة طويلة تحت المراقبة و هادشي لي ماكانش داخل في مصارف العلاج، المستشفى العمومي كان رخيييييص بزاااااف مقارنة مع المستشفى الخاص لي كان فيه بنفس الجودة و بعض الخطرات حسن

و لكن المصاريف مزال كينين و لهذا

و عاشنا و حد الفترة زوينة عتاقدنا أنه فعلا الطفل التعالج من بعد ما دار العملية ، و لكن الأم ديالو عرفت بعد مدة بتجربتها مع المرض انه رجع ليه فقررت أنها تسافر لواحد المنتجع صيفي باش براهيم ايستمتع بالحياة شوي، لأنه عيا فعلا من الدار و السبيطار “قالت إستمتع و هي متيقنة انه رجع ليه المرض” ،
وذاك ماكان وهما في المنتجع و سط المتعة ديالو بالبحر بدا تي تقيا الدم ، و على وجه السرعة جات ليه الاسعاف و داتو لأنقرة 8 ديال السوع و الاسعاف تضرب الطريق و الاسعاف تماك بحال شي شوبر ديال مستشفى خاص مجهزة مزيان ، حتى و صلوه للسبطار عمومي مختص بهاد النوع من الامراض و لي كان حسن من المستشفى الخاص ديال إسطنبول ، هنا قالو لينا بلي حلتو مابقاش اينفع فيها العلاج ???? ،
وذاك ما كان بقات الام ديالو تتقطع عليه حتى لطف بيه الرحمان هاد الصباح
شكرا لكل الناس لي و قفو معنا في المحنة ديالو شكرا لك المغاربة في التركية لي كانو بحال الاسرة صغيرة لإبراهيم ، لله ايصبرنا جميع
لله صبر الأم ديالو
لله لا كتب هاد المرض على شي إنسان لأنه فعلا وجه الموت القاسي”