عفراء علوي محمدي- كود//

ذكرات مصادر محلية بللي تسجلات هذ الصباح حالة وفاة جديدة بفيروس “كورونا” المستجد لشابة فعمرها 33 عام بمدينة خريبكَة.

وغير السيمانة اللي فاتت، علنات الوزارة على تسجيل مجموعة من الإصابات فإقليم خريبكَة، وكيتعلق الأمر بهذ الشابة، والوالد ديالها، وجوج خواتاتها، وهذو كاملين كانو شدو الفيروس من بعد مخالطة أحد الأقارب ديالهم اللي تبتات الإصابة ديالو حتى هو، حسب نفس المصادر.

وكانت كاتتلقى الشابة هي وأفراد الأسرة ديالها العلاج فالمستشفى الإقليمي الحسن الثاني فخريبكَة، قبل ما تتدهور الصحة ديالها وتفارق الحياة.

وكاتعتبر هذي ثاني حالة وفاة فإقليم خريبكَة بفيروس كورونا، من بعد ما توفات بالفيروس قبل واحد السيدة خمسينية كانت تقاست بيه من بعد حضورها لواحد كَنازة.

وممكن تكون هذي هي حالة الوفاة ال40 اللي سجلات اليوم الوزارة، كيف ممكن تكون هذي الحالة 41 من بعد ما تبت وفاة مفوض قضائي فسطات بالفيروس، بعدما نعاوه الزملاء ديالو ف”فيسبوك” اليوم الصباح.

وحسب آخر الأرقام اللي علنات عليها الوزارة، كاينة 676 إصابة بالفيروس فالمغرب، منها 29 حالة شفاء، و40 وفاة.