كود هناء ابو علي ////
ما فراسش لمغاربة اللي ما صوتوش على التراكتور٬ باللي رئيس الدولة يقدر يتاصل بحزب ماشي هو اللول. حزب بقى فذاكرتنا بطريقة نشأتو وبمسيرتو الشهيرة ديال ولد زروال. عبد اللطيف وهبي الامين العام لحزب الاصالة والمعاصرة قال البارح فالمجلس الوطني للحزب بللي محمد السادس كينقل ليكم تحياتو وتقديرو.
علاش الملك غادي ينقل لهاد الحزب التحيات والتقدير٬ ما قنعناش وهبي. كلمتو جا فيها: “اسمحوا لي قبل كل ذلك، أن أغتنم فرصة اللقاء بكم، لأنقل إليكم تحيات وتقدير جلالة الملك محمد السادس حفظه الله ونصره، لحزبنا، ولجميع مناضلاته ومناضليه” ثم اضاف “هذه التحيات الغالية التي رعانا بها جلالة الملك خلال الاستقبال الملكي الذي تشرفت به مباشرة بعد انتهاء مؤتمرنا الرابع بالجديدة، كانت دافعا قويا لعملنا الجماعي، وستظل محط اعتزاز وفخر، ونبراسا للعمل والاجتهاد بمسؤولية وروح وطنية عالية، حتى نكون عند حسن ظن صاحب الجلالة حفظه الله ونصره، وعند ثقة الشعب المغربي في النهوض بقضاياه المختلفة”.
ما قالش وقتاش اتصل بيه الملك. ما يمكنش هاد الشي بعد لقاؤو بيه بعد المؤتمر الرابع للحزب. حقاش كان يقولها بوضوح. ما يمكنش تجي اليوم وتقول هاد الجملة.
حزب ما ربح ما والو. داخل للحكومة ضدا على الاخلاق السياسية. ضدا على شعار حملته الانتخابية “بالمعقول”.
واش شفتو شي امين عام بحال الاستقلال او حتى التجمع اللي ربح الانتخابات قال لناس حزبو : انقل اليكم تحيات وتقدير جلالة الملك؟ ابدا.
اش هاد الخفة عاود ثاني
