كود اسماء غربي الرباط ////

تصريح وزير الشغل محمد يتيم اللي عضو فالامانة العامة لحزب العدالة والتنمية ولعب دور فاللي وقع لبنكيران واستوزار بنعرفة٬ فمراكش كان فيه ظلم للوزير وفنفس الوقت قودها بسخريتو العوجا.

من نهار وصل يتيم لمبتغاه وولى وزير وهو كيراكم الاخطاء التواصلية. هاد الطريقة فالتواصل اللي كان كيديرها قبل ولكن كان حزبي فيها. ما كانوش كيديوها فيه لمغاربة. دابا الوضع تغير. هو وزير فالحكومة. حكومة كلشي عارف كيفاش جات. كيزيد كيكره لمغاربة فيها. واليوم مع المقاطعة واجواءها الوضع ولى حساس اكثر.

نبداو باللي قالو يتيم وما فيه عيب وتم استغلالو بضربو. قال عن المقاطعة “البعض فهمو باللي انا مع او ضد =المقاطعة=. انا لست مع او ضد. ولست معنيا بهاد الموضوع لانني مسؤول حكومي لانني مسؤول حكومي والمجتمع هاداك الشغل ديالو”. سولو الصحافي وكمواطن اش كيبان ليك. رد “ما كاينش شخصيا دابا مواطن. ماشي مواطن دابا انا وزير. انت كتسولني كوزير. كون كنت مواطن ديال الزنقة ما تجيش تسولني ما غديش تسولني” فرد عليه الصحافي “اللا نسولك السيد الوزير” فرد عليه يتيم” اللا ما غتسولنيش”.

فهاد المقطع يتيم ما قالش باللي هو وزير ماشي مواطن. كذوب كذوب وكذوب اللي قالو هاد الشي. هو قال بوضوح ردا على سؤال بعد ما بغاش يجاوبو كوزير”نسولك مواطن” وقال ليه انا دابا مواطن. انا وزير” وكان واضح وما كال عيب كذلك باش قال ليك “كون كنت مواطن ما غتجيش تسولني”. فهاد القضية ديال مواطن ووزير يتيم كذبو عليه حرفو كلامو كولوه اللي ما كالش. انتقمو منو سياسيا. وظفوه كوقيد باش يضربو حكومتو وحزبو.

غير المشكلة اللي قودها فيها يتيم ماشي هاد العبارة ديال “كمواطن وكوزير” اللا هو انه قال كمسؤول حكومي لست معنيا” والحال ان الحكومة اخدت موقفا واضحا عبرت عنه في بيان رسمي وعبر الناطق الرسمي باسم الحكومة. ان يقول لست معنيا هادا غباء من سياسي كيقولو عليه عقل الحزب وقبله حركة الاصلاح والتوحيد ومنظرها. وباش يقول بوضوح اكثر. انا وزير الشغل ماشي مكلف بالاسعار تقويدة اكبر. حقاش هاد المقاطعة كتهم قطاعو بشكل خاص. الوزير الداودي وكان عندو الحق٬ خرج فالبرلمان محذرا من تزايد حدة المقاطعة كيقدر يدفع لشركة “دانون سانترال” تسد. بيان الحكومة قال باللي 650 الف فلاح مهددين ومنهم 120 الف خدامين مع سنترال. بلا ما نحسبو اللي خدامين مع سنترال مباشرة. اي الى طاحت سنترال دانون وبدات تخرج فعباد الله غادية تكون ازمة كبيرة. كتهم قطاع الشغل. يعني هاد الشي كيهمك يا السي اللي قاري الفلسفة

من غير المضمون. قودها يتيم فالشكل. طريقة اجاباتو كتبين على عجرفة وعياقة كتزيد تخلي الناس تكرهو. ما عندوش القبول باش كيهدر بهادك الطريقة. قبل هاد الشي للي قال رد بطريقة بغى يبان ساخر “المقاطعة ديال جافيل، كومير، خيزو، ماطيشة والبصلة أنا مادخلش فيهم”. فهاد الوقت دير هاد ليمور تاكل لعصا فاي بلاصة فالعالم. اللي قلق اللي شد فيه وسبو هو هاد الاسلوب. طريقتو فالتواصل غبية جدا.

بعض وزراء البي جي دي عندهم واحد النسبة من الغباء فالتواصل٬ خاصة محمد يتيم ولحسن الداودي. هاد الشي علاش ديما كيزبلوها. فهاد الحكومة ومن وزراء البي جي دي كاين مصطفى الرميد. لمغاربة عندهم عليه شخصية مختلفة، كيقلبو تقليقتو. كيقبلو اسلوبو. حقاش ذكي وكيعرف اش كيقول ووقتاش يقول. هاد الذكاء خاصو يعطيه لهاد الجوج.