كود احمد الطيب الرباط ////

كلشي كيشوف طاقات كثيرة فرياضات مختلفة كتهرب سواء لاوربا او للخليج. بعضهم حققو نتائج كبيرة بزاف بزاف. جابو الذهب لدول ما كانش العالم عارفها فين كاينة كيف وقع مع بعض الدول الخليجية.

ولات شبكات متخصصة فتهجير هاد الطاقات. كتخدم بحال شبكات الدعارة اللي كيديو لبنات. ما عمر المغرب حرك ساكن. باسم ما عرفناش اش من مصالح ضارب الطم. غير هاد الشي بدا كيتبدل. وفق مصدر ل”كود” فان وزير الشباب والرياضة رشيد الطالبي العلمي، خدام هاد ليام على هاد الملف.

وفق مصدر “كود” فان الوزير وبعد تقديمه هادي 15 يوم للاستراتيجيتين الوطنيتين للرياضة والشباب فالمجلس الحكومي خدام على لوضوع الطاقات الرياضية الموهوبة والواعدة، اللي كيهجروها سماسرية ما عندهم حتى شي شرعية باش يخدمو مهنة “الوكيل الرياضي”.

دابا الطالبي العلمي غادي يطبق وفق مصدر “كود” القانون المغربي اللي كيشتارط على الوكلاء اللي كيخدمو فالرياضة يكون عندهم اعتمادات من الجامعات المعنية لممارسة هذه المهنة.

وفق مصدر “كود” غادي يدعي اي واحد متطفل اي سمسار فالبشر فالابطال فالنجوم.