أحمد الطيب – كود الرباط //
وزير الصحة والحماية الاجتماعية خالد أيت الطالب، هاد الايام كثر من الخرجات الاعلامية، هاد الوزير لي كان كيتهرب من الصحافة اليوم رجع هو كولشي فالصحف الوطنية والدولية، كيقوليهم نجحنا فتدبير الجايحة وانا بوحدي مضوي البلاد.
ايت الطالب لي متسمك باغلاق الحدود ولي خلق اكبر اكذوبة علمية فاش قال اميكرون تولد فكازا وحتى خبراء وزارة الصحة حشمو يخرجو للإعلام يكذبوه. واخا هاد اميكرون مطلي المغرب كامل ومكيشكل خطر مقارنة مع دلتا، الا ان هاد الوزير فضل يدافع على اغلاق الحدود.
هاد الوزير قال لمجلة “جون أفريك” بلي مكايت تا شي حد يقدر امتى تفتح الحدود.
صحاب الوزير فاللجنة العلمية كيدافعو على اغلاق الحدود، ولكن دبا ولاو قلال، كيدافعو على السدان بمبرر الجرعة الثالثة مزال مخداوهاش كبار السن واللي عندهم هشاشة صحية وتراجع الناس على التلقيح مغاديش يساهم فالتقليص من الوفيات.
الوزير فالحوارات مع الصحافة الأجنبية استعرض فقط الإنجازات القليلة لي دارت فعهدو، رغم انها راه كانت فبرامج حكومية قبل ما يكون وزير.
